Մուրադյան․ Հալված և նորից սառեցված պաղպաղակը կարող է մանրէներ պարունակել

PanARMENIAN.Net - ԵՊԲՀ ռեկտոր Արմեն Մուրադյանը հորդորել է ուշադրություն դարձնել պաղպաղակի պահպանման պայմաններին, նշելով, որ հալված և նորից սառեցված պաղպաղակը կարող է մանրէներ պարունակել:

Նա ընդգծել է, որ պաղպաղակը, որպես սառեցված կաթնամթերք, հատկապես ամռան ամիսներին նախընտրելի ուտեստ է շատերի համար, սակայն, ինչպես ցանկացած սննդամթերք, այն ունի թե՛ դրական կողմեր, թե՛ հնարավոր վնասներ՝ կախված կազմից, օգտագործման հաճախականությունից ու չափից։

Ըստ մասնագետի՝ պաղպաղակն ունի մի շարք օգտակար հատկություններ՝

• Կալցիումի բնական աղբյուր է, քանի որ պատրաստվում է կաթից և նպաստում է ոսկրերի ու ատամների ամրացմանը։
• Արագ էներգիա տրամադրող է՝ շաքարների ու ճարպերի պարունակության շնորհիվ օգտակար կարող է լինել ակտիվ ապրելակերպ ունեցող մարդկանց, մասնավորապես՝ երեխաների համար։
• Բարձրացնում է տրամադրությունը և նվազեցնում սթրեսը՝ իր հաճելի համի և հովացնող ազդեցության շնորհիվ, ինչը խթանում է դոպամինի ու սերոտոնինի արտազատումը։
• Օգնում է ժամանակավորապես նվազեցնել մարմնի ներքին ջերմաստիճանը շոգ եղանակին։

Միաժամանակ նա նախազգուշացրել է հնարավոր վտանգների մասին՝

• Բարձր քանակով շաքար պարունակող պաղպաղակները կարող են առաջացնել ատամների խոցելիություն, քաշի ավելացում և շաքարային դիաբետի դեպքում գլյուկոզի կտրուկ աճ։
• Որոշ պաղպաղակներում առկա են արհեստական գունանյութեր ու հավելումներ (E-xxx), որոնք կարող են առաջացնել ալերգիկ ռեակցիաներ կամ վնասել առողջությանը՝ երկարատև օգտագործման դեպքում։
• Յուղալի պաղպաղակներում ճարպերն ու կալորիաները բարձր են, ինչը նպաստում է սրտանոթային հիվանդությունների ռիսկի ավելացմանը։
• Սառը ազդեցությունը, հատկապես մեծ քանակությամբ ու արագ ուտելու դեպքում, կարող է հանգեցնել կոկորդի բորբոքման, գլխացավի (brain freeze) կամ մարսողական խնդիրների՝ հատկապես լակտոզայի նկատմամբ անհանդուրժողականության դեպքում։

Մուրադյանը ներկայացրել է նաև օգտակար խորհուրդներ՝ վնասներից խուսափելու համար․

• Նախընտրելի է ընտրել բնական պաղպաղակ՝ առանց հավելումների և գունանյութերի։
• Սահմանափակել օգտագործման քանակը՝ շաբաթական առավելագույնը երկու անգամ՝ փոքր չափաբաժնով։
• Կարելի է պատրաստել տնային պայմաններում՝ օգտագործելով մրգեր, յոգուրտ կամ սառեցված բանանի խյուս։
• Պահպանման պայմաններին հետևելը պարտադիր է, քանի որ հալվելու և նորից սառեցվելու դեպքում պաղպաղակը դառնում է պոտենցիալ մանրէակիր։

«Պաղպաղակը ճիշտ պահպանելու համար խորհուրդ է տրվում՝

• Սառցախցիկը պետք է ապահովի -18°C կամ ավելի ցածր ջերմաստիճան։
• Կրկնակի սառեցումը խստիվ արգելվում է՝ այն կարող է նպաստել բակտերիաների բազմացմանը։
• Ամեն բացումից հետո պետք է տարան անմիջապես փակել և վերադարձնել սառցախցիկ՝ առանց ուշացման։
• Պաղպաղակը խորհուրդ է տրվում պահել սառցախցիկի խորքում, ոչ դռան հատվածում, քանի որ այնտեղ ջերմաստիճանը հաճախ փոփոխվում է։
• Եթե հանել եք պաղպաղակը բուն փաթեթից, պահեք փակ տարայի մեջ՝ պաշտպանելու համար արտաքին հոտերից և բակտերիալ աղտոտումից։

Փչացած պաղպաղակի հիմնական նշաններն են՝

. Սառույցի բյուրեղներ ամբողջ մակերեսին,

. Տարօրինակ հոտ կամ համ,

. Ջրալի, հատիկավոր կամ անհարթ կառուցվածք,

. Փոխված գույն։

Թունավորման դեպքում խորհուրդ է տրվում՝

•Օգտագործել բավարար քանակությամբ հեղուկներ՝ ջուր կամ աղային լուծույթներ,

•Հանգիստ դիրքով պառկել,

•Մի քանի ժամ խուսափել ծանր սննդից,

•Երկարատև կամ ուժեղ ախտանիշների դեպքում անհապաղ դիմել բժշկի, հատկապես՝ երեխաների և հղի կանանց դեպքում»,–ասվում է գրառման մեջ։