Մոսկվայում տեղի ունեցավ բանավեճ, որի թեման էր` «Լեռնային Ղարաբաղ. հիմնախնդիրն առանց լուծման»

27 փետրվարի 2010 - 14:56 AMT

PanARMENIAN.Net -
«Ռոսբալտ» տեղեկատվական գործակալության քաղակումբում (Մոսկվա) տեղի ունեցավ բանավեճ, որի թեման էր` «Լեռնային Ղարաբաղ. հիմնախնդիրն առանց լուծման»: Բանավեճի ընթացքում քննարկվեցին հետեւյալ հարցերը` տարարծաշրջանում նոր պատերազմի ծագման հավանականությունը, ինչպիսի՞ն պետք է լինի խելամիտ փոխհամաձայնությունը: Ի՞նչ ազդեցություն կունենա ԼՂՀ առաջարկությունը, ըստ որի Ղարաբաղյան հակամարտության կարգավորման քննարկումները ազգային հարթությունից պետք է տեղափոխել միջազգային իրավունքի համատեքստ, եւ հայ-թուրքական հարաբերությունների կարգավորումը «ղարաբաղյան հիմնախնդրի» լուծման հեռանկարների վրա:

Բանավեճին մասնակցում էին պատմական գիտությունների թեկնածու, քաղաքագետ, Կովկասի հարցերով փորձագետ Սերգեյ Մարկեդոնովը, պատմաբան, քաղաքագետ Դարյա Միտինան, Լեռնային Ղարաբաղի արտաքին գործերի նախարարի խորհրդական Ռուբեն Զարգարյանը, Ռազմավարական զարգացման նորարարական կենտրոնի առաջին փոխնախագահ Գրիգոր Տրոֆիմչուկը, հասարակական-քաղաքական գործիչներ, հաղորդում է «Ռոսբալտ»-ը:

Ղարաբաղա-ադրբեջանական հակամարտությունը

Ղարաբաղա-ադրբեջանական հակամարտությունը սկսվեց 1988 թվականին: Ի պատասխան Լեռնային Ղարաբաղի ինքնավար մարզի (ԼՂԻՄ) բնակչության 80% կազմող հայերի խաղաղ պահանջներին, Ադրբեջանը ագրեսիա ծավալեց խաղաղ բնակչության դեմ: 1991-1994թթ. ազգային-ազատագրական պատերազմի արդյունքում հռչակվեց Լեռնային Ղարաբաղի Հանրապետությունը: ԼՂՀ պաշտպանության բանակը նաեւ ԼՂՀ շուրջ անվտանգության գոտի ստեղծեց, որը 7 շրջաններ է ներառում: 1994թ. մայիսի 11-ին հրադադարի մասին համաձայնություն ձեռք բերվեց (Բիշկեկյան արձանագրություն): Ներկայումս հակամարտության կարգավորմամբ զբաղվում են ԵԱՀԿ Մինսկի խմբի համանախագահները` Ֆրանսիան, ԱՄՆ-ն եւ Ռուսաստանը: