Լիոնում բողոքի ցույց է տեղի ունեցել` ընդդեմ Ջավախքում մարդու իրավունքների խախտման

PanARMENIAN.Net - Ապրիլի 3-ին Վրաստանում մարդու իրավունքների պաշտպանության խմբի նախաձեռնությամբ Լիոնի (Ֆրանսիա) France 3 հեռուստաընկերության շենքի մոտ տեղի ունեցավ բողոքի ցույց` ընդդեմ Ջավախքում մարդու իրավունքների խախտման: Այս մասին ասված է Վրաստանում մարդու իրավունքների պաշտպանության խմբի PanARMENIAN.Net ի խմբագրություն ուղարկած հայտարարության մեջ:

“Ջավախքում տիրող իրավիճակով անհանգստացած ցուցարարները բարձրացրել էին Վրաստանի դրոշը, տրանսպարանտներ, նաև վանդակի մեջ առնված վարդեր, որոնք խորհրդանշում էին ազատության ոտնահարումը և “վարդերի հեղափոխության” ձախողումը: Ցուցարարները դատապարտել են Ջավախքում հայերի հանդեպ խտրականությունն ու քաղաքական հետապնդումները”, - ասվում է խմբի հայտարարության մեջ:

Հայտարարության մեջ նշվում է նաև, որ բողոքի հաջորդ ցույցը տեղի կունենա մայիսի 15-ին, Լիոնի TLM հեռուստաընկերության շենքի մոտ:

Ջավախք

Ջավախքն հնուց ի վեր բնակեցված է եղել հայերով, ինչի մասին վկայում են ինչպես հայկական, այնպես էլ վրացական, արաբական, թուրքական եւ այլ աղբյուրները: Ըստ վրաց Լեոնտի Մրովելիի աղբյուրի, IV դարի սկզբում Ջավախքի բնակչության խոսակցական լեզուն հայերենն էր:

Սակայն թուրքական տիրապետության հաստատումը զգալի ազդեցություն ունեցավ Ջավախքի ազգային կազմի վրա: Աստիճանաբար, երկրամասի քրիստոնյա բնակչությունը, եւ առաջին հերթին հայ բնակչությունը, նվազում էր, իսկ դրա փոխարեն ավելանում էր մահմեդական բնակչության քանակը, հիմնականում լազերի եւ չերքեսների հաշվին: 18դ. վերջում Ջավախքը կորցրեց իր բնիկ հայ բնակչության զգալի մասը, որի մի հատվածը տեղափոխվեց այլ տարածքներ, իսկ մի մասն ուղղակի ոչնչացվեց:

Ջավախքի միացումը Ռուսաստանին մեծ նշանակություն ունեցավ հայ բնակչության նորմալ կյանքի եւ գործունեության համար: Երկրամասը դարձավ Կովկասի առեւտրի ու արհեստագործության ամենամեծ կենտրոններից մեկը, Կարապետ Բագրատունու ջանքերով բացվեց Մեսրոբյան հայտնի դպրոցը: Ջավախքում են ծնվել եւ մեծացել հայ ժողովրդի բազմաթիվ ականավոր գործիչներ` գրողներ Դերենիկ Դեմիրճյանն ու Վահան Տերյանը, ԵՊՀ առաջին ռեկտոր Հակոբ Մանադյանը, Հայաստանի Առաջին Հանրապետության սպարապետ Ռուբեն Տեր-Մինասյանը եւ շատ ուրիշներ: Հայաստանի Հանրապետության չորս վարչապետներից երկուսը` Հովհաննես Քաջազնունին եւ Համո Օհանջանյանը եւս ծնունդով Ախալքալաքից են:

1921թ. փետրվարին Ջավախք կրկին ներխուժեցին թուրքական զորքերը: Վրացական զորքերը, ինչպես եւ 1918թ., կրկին ոչ մի օգնություն ցույց չտվեցին այդ շրջանի հայ բնակչությանը, որը ստիպված էր սեփական ուժերով դիմադրել թուրքական զորքերին: Թուրքական զորքերի ներխուժման, սովի եւ հիվանդությունների արդյունքում 1918-1921թթ. Ախալքալաքի շրջանում զոհվեց հայ բնակչության շուրջ 50 տոկոսը:

Ներկայումս Ջավախքի հայերը պայքարում են Վրաստանի կազմում ինքնավարության հասնելու համար:

 Ուշագրավ
Գերատեսչությունը հայտնել է նաև գերիների թիվը՝ 511 զինծառայող 7 1 քաղաքացիական
Կավելացվեն ծախսերը նաև հատուկ նշանակության նախագծերի ֆինանսավորման համար
---