Գերմանիայի ԱԳ նախարար. Թուրքիան դեռևս չի հասունացել ԵՄ-ին անդամակցելու համար

27 հուլիսի 2010 - 18:54 AMT

PanARMENIAN.Net - Գերմանիայի փոխկանցլեր և արտգործնախարար Գիդո Վեստերվելլեն այցով Ստամբուլ մեկնելիս հայտնել է, որ Թուրքիան ներկա պահին դեռևս չի հասունացել ԵՄ-ին անդամակցելու համար:

«Եթե այդ հարցը լուծման ենթակա լիներ այսօր, Թուրքիային պատրաստ չէին համարի Եվրամիությանն անդամակցելու համար»,- նշել է Գերմանիայի ԱԳ նախարարը: Այնուամենայնիվ, Վեստերվելլեն ընդգծել է այն բանի կարևորությունը, որպեսզի Թուրքիան շարունակի կողմնորոշվել դեպի Եվրոպա:

Թուրքիան, նախարարի խոսքով, կարող է զգալի, կառուցողական օգնություն ցուցաբերել Աֆղանստանում, Իրանում կամ Մերձավոր Արևելքում ծագող հակամարտությունների լուծման ժամանակ:

Գիդո Վեստերվելլեն չպատասխանեց այն հարցին, թե արդյոք ինքն անհրաժեշտ է համարում Թուրքիայի հնարավոր անդամակցությունը ԵՄ-ին համաեվրոպական հանրաքվեի դնել` նշելով, որ չի ցանկանում շահարկել մի թեմա, որը դեռևս չի պատրաստվում արդիական դառնալ:

Նրանք, ովքեր գտնում են, որ Թուրքիայի անդամակցությունը Եվրամիությանը պետք է տեղի ունենա մոտ ժամանակներս, Վեստերվելլեի կարծիքով, սխալվում են: «Իրականում այժմ կարևորը Թուրքիային չվիրավորելն է և փորձել այնպիսի տպավորություն չստեղծել, թե իբր մենք հետաքրքրված չենք նրանով»,- ամփոփել է նա, հաղորդում է Lenta.ru-ն:

Հղումներ թեմայով.

Глава немецкого МИДа счел Турцию не созревшей для вступления в ЕС

Թուրքիան ԵՄ մուտք գործելու բանակցություններ

Թուրքիան ԵՄ մուտք գործելու բանակցություններն սկսել է 2005 թ. : 1963 թ. Թուրքիան Եվրոպական տնտեսական համագործակցության հետ պայմանագիր է ստորագրել, որի համաձայն երկիրն իրավունք է ձեռք բերում ԵՄ մուտք գործելու:

1978-1979 թթ. Թուրքիային առաջարկում են Հունաստանի հետ միասին անդամագրվել ԵՏՀ մեջ, որից հրաժարվում է: 1980 թ. զինվորական հեղաշրջումից հետո Եվրոպան դադարեցնում է Անկարայի հետ հարաբերությունները, սակայն այն վերականգնվում է միայն 1983 թ.: Սակայն 1997 թ. ԵՄ հրաժարվում է Թուրքիային ճանաչել որպես ԵՄ մուտք գործելու թեկնածու, սակայն այդ իրավունքը Թուրքիան ստանում է 2000 թ.` պայմանով, որ բարեփոխումներ կատարի մարդու իրավունքների պաշտպանության օրենսդրության մեջ:

2002 թ. օգոստոսին բարեփոխումների ծրագիրը հաստատում է Թուրքիայի խորհրդարանը, եւ 2004 թ. հոկտեմբերին Եվրահանձնաժողովը միջնորդում է, որպեսզի սկսվեն Թուրքիայի ԵՄ անդամ դառնալու բանակցությունները:

Թուրք - եվրոպական հարաբերությունները բարդացնում է Կիպրոսի հարցը, որին Թուրքիան չի ցանկանում ճանաչել: Կիպրոսը 2004 թ. ԵՄ կազմի մեջ է: 1974 թ. Թուրքիան բռնազավթում է Կիպրոս կղզու մի հատվածը, եւ մինչ օրս չի ճանաչում հարավային կառավարության` հունական հատվածի լեգիտիմությունը: