Երևանում տեղի է ունեցել Սլավա Ստեփանյանի բեմականացմամբ «Ոտքի’, դատարանն է գալիս» ներկայացման պրեմիերան

6 սեպտեմբերի 2010 - 17:03 AMT

PanARMENIAN.Net - Միջազգային «Կարոտ» փառատոնի շրջանակներում երեկ տեղի ունեցավ Պերճ Զեյթունցյանի «Ոտքի’, դատարանն է գալիս» պիեսի մոտիվներով համանուն ներկայացման պրեմիերան»,-ասել է փառատոնի հիմնադիր ու նախագահ Մեցո Իգիթյանը սեպտեմբերի 6-ին կայացած մամլո ասուլիսում:

Ներկայացմանը մասնակցել են հայտնի ռուսաստանցի դերասաններ, ՌԴ ժողովրդական դերասաններ Էմմանուիլ Վիտորգանը, Իգոր Կոստոլևսկին և Ալեքսեյ Պետրենկոն: Ներկայացումը բեմադրել է Մոսկվայի հայկական թատրոնի գեղարվեստական ղեկավար Սլավա Ստեփանյանը:

«Մասնակցությունը ներկայացմանը, և դրանում ինձ հետ համամիտ կլինեն իմ գործընկերները, ոչ թե զուտ դեր է, այլ մեր մարդկային դիրքորոշումը, մեր վերաբերմունքն է Հայոց ցեղասպանության հանդեպ, մեր ցավն է, ընակալումը, ցասումն ու այն ամենի մերժումը, ինչ կատարվել է»,-ասել է Իգոր Կոստոլևսկին:

Խոսելով հայ հանդիսատեսի արձագանքի մասին` դերասանը նշել է, որ, բեմ դուրս գալով, նա կողմնորոշվում է դահլիճում տիրող լռությամբ: «Երեկ այնպիսի զգացողություն էր, կարծես հանդիսատեսը դահլիճ է եկել մի մեծ ցավով, տագնապով, ինչը հաղորդվում էր նաև մեզ»,-ասել է Իգոր Կոստոլևսկին: Նա նշել է նաև, որ հաճույքով կխաղա հայկական թատրոններում, եթե նրան հրավիրեն:

Սլավա Ստեփանյանի բեմականացմամբ «Ոտքի’, դատարանն է գալիս» ներկայացումը բեմ է ելնում երկրորդ անգամ: Նրա մոսկովյան պրեմիերան տեղի է ունեցել 2 տարի առաջ: