Երևանն ու Սանկտ Պետերբուրգը կփոխանակվեն հյուրանոցներով

PanARMENIAN.Net - Սանկտ Պետերբուրգի նահանգապետ Վալենտինա Մատվիենկոյի հրավերով հուլիսի 6-ից 8-ը Երևանի քաղաքապետ Կարեն Կարապետյանի գլխավորած պատվիրակությունը երկօրյա պաշտոնական այցով գտնվում էր Սանկտ Պետերբուրգում։ Հանդիպման ավարտին Սանկտ Պետերբուրգի կառավարության և Երևանի քաղաքապետարանի միջև ստորագրվել է առևտրատնտեսական, գիտատեխնիկական և հումանիտար ոլորտներում 2011-2014թթ. համագործակցության ծրագիր:

Ինչպես հաղորդում է Երևանի քաղաքապետարանի տեղեկատվության և հասարակայնության հետ կապերի վարչությունը, Երևանի քաղաքապետը հույս է հայտնել, որ այդ համաձայնագիրը խթան կհանդիսանա համագործակցության կառուցողական ծրագրերի իրականացման համար: «Այսօր մենք մեր գործընկերների հետ խոսել ենք և պայմանավորվել, որ յուրաքանչյուր կողմը առավելագույն ջանք կգործադրի, որպեսզի այդ փաստաթուղթը զուտ փաստաթուղթ չմնա: Կարծում եմ` մենք կունենանք բավականին հետաքրքիր շարունակություն»,- նշել է նա:

Ընդգծելով համագործակցության զգալի ներուժը` Վալենտինա Մատվիենկոն իր հերթին վստահեցրել է, որ Երևանի հետ հարաբերությունները Պետերբուրգի համար միշտ հեռանկարային են եղել:

Համագործակցության քառամյա ծրագիրը, որն ուղենշում է կոնկրետ ուղղություններ, նախատեսում է Երևանի և Սանկտ Պետերբուրգի միջև իրականացնել փորձի փոխանակման և ներդրումային ծրագրեր` մշակույթի, կրթության, աղբահանության, բնապահպանության, սպորտի և մի շարք այլ բնագավառներում:

Կողմերը պայմանավորվածություն են ձեռք բերել նաև աշխատանքներ իրականացնել Սանկտ Պետերբուրգում «Երևան» առևտրի տան հիմնման, ինչպես նաև Սանկտ-Պետերբուրգում «Երևան» և Երևանում «Սանկտ Պետերբուրգ» հյուրանոցների կառուցման մասով: