«Զվարթնոց» օդանավակայանի նոր տերմինալը շահագործման կհանձնվի սեպտեմբերի 16-ին

25 օգոստոսի 2011 - 17:11 AMT

PanARMENIAN.Net - Հայաստանի անկախության 20-ամյակի տոնակատարություններին նվիրված լայնամասշտաբ միջոցառումների շրջանակում ծրագրված է շահագործման հանձնել «Զվարթնոց» օդանավակայանի նոր տերմինալը: Ինչպես PanARMENIAN.Net ի թղթակցի հետ զրույցում հաղորդել են օդանավակայանի մամլո ծառայությունից, պաշտոնական միջոցառումը կկայանա սեպտեմբերի 16-ին Հայաստանի նախագահ Սերժ Սարգսյանի, ինչպես նաև տարբեր երկրների դեսպանների մասնակցությամբ:

Նոր տերմինալն ամբողջությամբ կփոխի ուղևորների պատկերացումներն օդանավակայանի ծառայությունների մատուցման մասին` դրանք ներկայացնելով որակապես նոր տեսանկյունից: Կարելի է ասել, որ վերջին 20 տարիների ընթացքում Հայաստանը նման մասշտաբի և նշանակության օբյեկտ շահագործման չի հանձնել: Ավելին, նոր տերմինալն իր սարքավորումներով առաջատարը կդառնա տարածաշրջանում:

Տերմինալը 34 հազար քառ. մ տարածք է զբաղեցնում: Համալիրի շենքում կտեղակայվեն բարձր դասի սրահներ ուղևորների և դիվանագետների սպասարկման համար, իսկ գրանցման սրահն ընդհանուր առմամբ 46 գրանցակետ կունենա: Նոր տերմինալում նախատեսված է կենտրոնացված ջերմամատակարարում, օդափոխանակության ժամանակակից և բարձրորակ համակարգ:

Տերմինալն իր գործառույթները կկատարի նաև երկրաշարժի դեպքում, առանց որևէ խնդիրների. շենքը 9-բալանոց սեյսմակայունություն ունի: Արտակարգ իրադրությունների դեպքում արտաքին աշխարհի հետ անխափան կապի ապահովումն օդանավակայանի բարեկարգման նպատակներից մեկն է:

«Զվարթնոց» միջազգային օդանավակայանի բարեկարգման աշխատանքներն իրականացվում են 2002 թվականից «Արմենիա – Միջազգային օդանավակայաններ» ՓԲԸ կողմից` 2001 թվականին ՀՀ կառավարության կողմից տրամադրված 30-ամյա կոնցեսիոն կառավարման համաձայն: Ներդրումային ծրագրի արժեքը կազմում է մոտ 160 մլն ԱՄՆ դոլար: Այսօրվա դրությամբ օդանավակայանը տարեկան 1 միլիոն 100 հազար ուղևոր է սպասարկում, նոր տերմինալը շահագործման հանձնելուց հետո այն կկարողանա մինչև 3 միլիոն ուղևոր սպասարկել: