4-րդ միջազգային դեղագործության մրցունակության համաժողովը նվիրվում է ՀՀ անկախության 20–ամյակին

31 հոկտեմբերի 2011 - 20:39 AMT

PanARMENIAN.Net - Նոյեմբերի 9-ին Հայաստանի Դեղ արտադրողների և ներմուծողների միությունը Հայաստանի էկոնոմիկայի և առողջապահության նախարարությունների հետ կազմակերպում է ամենամյա 4-րդ միջազգային դեղագործության մրցունակության համաժողովը։ Համաժողովն այս տարի նվիրվում է Հայաստանի Հանրապետության անկախության 20–ամյակին։ Այն բաղկացած է 2 նիստից՝ «Անկախ Հայաստանի ձեռքբերումները դեղագործության ոլորտում» և «Միջազգային լավագույն ձեռքբերումները դեղագործության ոլորտում»։

Կազմակերպիչները նշում են, որ ներկայացվելու է հայրենական դեղարտադրության ողջ ներուժը, առանձնահատկություններն ու առավելությունները, այն ամենը, ինչի շնորհիվ հայկական դեղարդյունաբերությունն առանձնանում է ողջ տարածաշրջանում։ Համաժողովի 2-րդ մասում օտարերկրյա միջազգային դեղագործական ընկերությունների արտերկրից ժամանած ներկայացուցիչները ներկայացնելու են իրենց «լավագույն փորձը», դեղարարության այն չափանիշներն ու որակները, որոնցով առաջնորդվում են աշխարհի առաջատար դեղարտադրողները։

Համաժողովին մասնակցելու են ավելի քան 400 բժիշկներ, դեղագետներ, գիտնականներ, փորձագետներ ամբողջ Հայաստանից։ Մասնակցություն և ելույթներ են ունենալու ՀՀ պետական մարմինների՝ դեղագործության ոլորտը կարգավորող ու վերահսկող օրենսդիր և գործադիր մարմինների ներկայացուցիչներ։

Պատվիրակություններ են ներկայանալու Եվրոպական մի շարք երկրներից, հյուրեր և խոսնակներ են հրավիրված ԱՊՀ տարածքի երկրներից։ Համաժողովին զուգահեռ անցկացվելու է Դեղագործական ցուցահանդես։

Համաժողովի 2-րդ օրը այցելություններ են կազմակերպված դեպի Հայաստանի տեսարժան վայրեր, հայրենական դեղարդյունաբերության խոշոր ընկերություններ՝ «Լիկվոր» և «Արփիմեդ» ընկերությունների գործարաններ, տարածաշրջանում իր տեսակի մեջ միակ «Դարմանթեստ Լաբորատորիս» լաբորատորիա։