Արամ Խաչատրյան համերգասրահում կնշեն Սպենդիարյանի 140-ամյակը

9 նոյեմբերի 2011 - 22:35 AMT

PanARMENIAN.Net - Նոյեմբերի 18-ին Արամ Խաչատրյան համերգասրահում տեղի է ունենալու համերգ` նվիրված հայ անվանի կոմպոզիտոր Ալեքսանդր Սպենդիարյանի ծննդյան 140-ամյա հոմբելյանին:

Համերգում հնչելու են կոմպոզիտորի «Երեք արմավենի» սիմֆոնիկ պատկերը, «Էտյուդ հրեական թեմաներով», «Ղրիմյան էսքիզներ», «Էնզելի»` «Երևանյան էտյուդներից» և սիմֆոնիկ ու վոկալ հատվածներ «Ալմաստ» օպերայից: Հնչելու է նաև Ռիխարդ Շտրաուսի Տերցետ «Վարդերի ասպետը» օպերայից հատվածներ (Մենակատարներ` Մարինե Դեինյան, (սոպրանո), Մագդա Մկրտչյան, (սոպրանո), Քրիստինե Սահակյան, (մեցո սոպրանո), Պերճ Քարազյան, (տենոր) դիրիժոր` Հարություն Արզումանյան):

Հայ դասական երաժշտության հիմնադիր, կոմպոզիտոր, խմբավար, մանկավարժ, հասարակական գործիչ Ալեքսանդր Աֆանասիի Սպենդիարյանը ծնվել է Տավրիկյան նահանգի Դնեպրովյան գավառի Կախովկա ավանում(այժմ Ուկրաինայի Խերսոնի մարզ): Նրա նախնիները Հայաստանի հին մայրաքաղաք Անիից էին: Կոմպոզիտորի մանկությունն ու պատանեկությունն անցել են Սիմֆերեպոլում: Ստեղծագործական կարողությունները երաժշտության, նկարչության և պոեզիայի նկատմամբ ի հայտ են եկել մանուկ հասակից: 1882թ-1890թթ միջնակարգ կրթություն է ստացել Սիմֆերոպոլի դասական գիմնազիայում: 1890-1895թթ սովորել է Մոսկվայի պետական համալսարանում, nվագել է ուսանողական նվագախմբում՝ որպես առաջին ջութակ: Այդ տարիներին զուգահեռաբար շարունակվում են ջութակի պարապմունքները մեծ թատրոնի դերասան Պեկարսկու և կոմպոզիցիայի տեսության դասերը ռուս կոմպոզիտոր, ազգագրագետ Ն. Ս. Կլենովսկու մոտ: 1896-1900 կոմպոզիցիայի մասնավոր դասեր է առել ռուս կոմպոզիտոր Ն. Ռիմսկի-Կորսակովի մոտ: 1901-1917 թթ-ին ապրել է Ղրիմում, զբաղվելով ակտիվ ստեղծագործական, խմբավարական, մշակութային և հասարակական գործունեությամբ: 1924թ-ին Հայասատանի իշխանությունների հրավերով Սպենդիարյանը տեղափոխվում է Հայաստան` նախաձեռնելով երաժշտական մշակույթի զարգացման լայնածավալ աշխատանքներ: Նրա ջանքերուվ Երևանի կոնսերվատորիայում ստեղծվում է առաջին նվագախմբային դասարանը, կազմակերպվում է առաջին սիմֆենիկ նվագախումբը, որի առաջին համերգը ղեկավարում է Ալ. Սպենդիարյանը: