Մանկական եվրատեսիլի շվեդ մասնակցի երգը գրել է մրցույթի փորձառու երգահաններից մեկը

PanARMENIAN.Net - «Մանկական Եվրատեսիլ 2011»-ի Շվեդիայի ներկայացուցիչ Էրիկ Ռապպին Երևանը շատ է դուր եկել: Նա նշեց, որ քաղաքը հետաքրքիր է իր հին և նոր շենքերով, որոնք գեղեցիկ ծառերի հետ հետաքրքիր կոմպոզիցիա են ստեղծում: Նա նախընտրում է բակային խաղերը, և ազատ ժամանակ անցկացնում է այնտեղ իր ընկերների հետ վազվզելով: Նա ամենից շատ սիրում է «Մուլեն ռուժ» ֆիլմը, քանի որ այն ունի լավ բովանդակություն և ողողված է երաժշտությամբ: Էրիկին երգը գրելու համար օգնել է փորձառու երգահան Յոհան Յամթբերգը, ով արդեն չորրորդ տարին է, ինչ աշխատում է մրցույթի մասնակիցների հետ: Ի տարբերություն մյուս մասնակիցների, Էրիկ Ռապպը վստահ չէ, որ ցանկանում է մասնակցել մեծերի Եվրատեսիլին, քանի որ այն շատ ավելի պատասխանատու է և մեծ մրցույթ է:

«Մանկական Եվրատեսիլ-2011»-ը տեղի է ունենալու դեկտեմբերի 3-ին Կ. Դեմիրճյանի անվան մարզահամերգային համալիրում: Դեռ 2010 թ-ի վերջին Հայաստան էին ժամանել շվեդ փորձագետներ, ովքեր ուսումնասիրել են մարզահամերգային համալիրը և ընդհանուր պայմանները:

Մրցույթը բացելու է Ռուսաստանը, իսկ եզրափակելու է Բելգիան: Հայաստանը ներկայանալու է 4-րդ համարի տակ: Հայաստանը «Մանկական Եվրատեսիլին» մասնակցում է 2007թ-ից: Առաջինը այդ մրցույթում Հայաստանը ներկայացրել է «Արևիկ» խումբը «Երազանք» երգով և գրավել 2-րդ տեղը, 2008 թ-ին Մոնիկա Մանուչարովան և գրավել է 8-րդ տեղը իր «Իմ երգի հնչյունը» երգով: 2009 թվականին «Մանկական Եվրատեսիլ» մրցույթում Հայաստանը ներկայացրեց Լուարա Հայրապետյանը «Բարսելոնա» երգով և գրավեց 2-րդ տեղը` այն կիսելով Ռուսաստանի ներկայացուցիչ Եկատերինա Ռյաբովայի հետ: 2010թ. նոյեմբերի 20-ին «Մանկական Եվրատեսիլ-2010» մրցույթում Հայաստանին հաղթանակ բերեց Վլադիմիր Արզումանյանը իր «Մամա» երգով: Այս տարի Հայաստանը ներկայացնելու է Դալիթան իր Welcome to Armenia երգով: