Աղանդների դեմ պայքարողներն ահազանգում են. Հայաստանում ավելի քան 100 հազար մարդ այս կամ այն աղանդի անդամ է

10 նոյեմբերի 2010 - 16:33 AMT

PanARMENIAN.Net - Հայաստանում գոյություն ունի մասնագետների, փորձագետների պակաս աղանդավորության հոգեբանության և աստվածաբանության ոլորտում, որոնք կարող են պայքարել աղանդների տարածման դեմ: Այդ մասին նոյեմբերի 10-ին «Աղանդները հետխորհրդային տարածքում. սպառնալիքի աստիճանը և հոգևոր անվտանգությունը» թեմայով Երևան-Մոսկվա-Թբիլիսի-Կիև հեռուստակամրջի ժամանակ հայտարարել է «Քայքայիչ պաշտամունքներից տուժածների օգնության և վերականգման կենտրոնի ղեկավար» ՀԿ-ի տնօրեն Ալեքսանդր Ամարյանը:

Նրա խոսքերով, Հայաստանում աղանդների արագ աճը պայմանավորված է նրանով, որ չկան կենտրոններ, որոնք կարող են մարդկանց հավաստի տեղեկատվություն տրամադրել կրոնի, աստվածաբանության և աղանդավորության մասին: «Այսօր մեր կազմակերպությունից բացի երկրում չկան այդ խնդրով զբավող այլ կազմակերպություններ»,- ասել է նա:

Նա նշել է, որ Երևանի գրախանութներում կարելի է գտնել հսկայական քանակությամբ աղանդավորական գրականություն, սակայն բացակայում է հակաաղանդավորական գրականությունը: «Հայաստանում պետական մակարդակով աղանդների դեմ պայքար չկա, բայց դա անհրաժեշտ է»,- ասել է Ամարյանը:

Նա նաև ավելացրել է, որ Հայաստանի ավելի քան 100 հազար բնակիչ հարում է այս կամ այն աղանդին: