Հայ երիտասարդ կենսաբանները Facebook-ում արշավ են սկսել ի պաշտպանություն Արմավիրի կենդանաբանական այգու

1 ապրիլի 2011 - 11:18 AMT

PanARMENIAN.Net - «Երիտասարդ կենսաբանների ասոցիացիա» հասարակական կազմակերպությունը Facebook սոցիալական ցանցում արշավ է սկսել ի պաշտպանություն Արմավիր մարզի կենդանաբանական այգու կենդանիների: Ինչպես նշվում է սոցցանցում տեղադրված հայտարարության մեջ, ՀԿ-ն կոչ է անում Facebook-ի ծառայություններից օգտվողներին էլեկտրոնային նամակ ուղարկել ՀՀ պաշտպանության նախարար Սեյրան Օհանյանին և աջակցություն հայտնել Արմավիրի կենդանաբանական այգուն:

Բացի այդ, կենդանաբանական այգու փրկության համար պայքարող խումբը ապրիլի 3-ին կազմակերպում է հեծանվարշավ դեպի Արմավիրի կենդանաբանական այգի:

1981թ.-ից Արմեն Թադևոսյանը սկսել է Արմավիր մարզի կենդանաբանական այգու հիմնման գործընթացը: Կենդանիները բերվել են ՀՀ մարզերից և ԽՍՀՄ տարբեր այգիներից: 1991թ. սկսած այգին արդեն ունեցել է սեփական հողատարածք: Այժմ այգին զբաղեցնում է 8 հա տարածություն, ուր բնակվում են մի քանի տասնյակ կենդանատեսակներ: Այս ընթացքում այգու տարածքում տնկվել է մի քանի հազար դեկորատիվ ծառ: Նշենք, որ կենդանաբանական այգին կացարան է դարձել մարդու գործունեությունից տուժած և փրկված բազմաթիվ կենդանիների համար, այդ թվում` վիրավոր արջեր, մացառախոզեր, կզաքիս, տափաստանային կատու, քարարծիվներ, բվեճներ, սպիտակագլուխ անգղներ և այլն: Կենդանաբանական այգում բնակվում են նաև բազմաթիվ կենդանատեսակներ, որոնք ընդգրկված են ՀՀ Կարմիր գրքում: Մինչ այժմ այգում բնակվող կենդանիների սննդի ապահովման հարցում իր մեծ ներդրումն ուներ ՀՀ ՊՆ Մարշալ Բաղրամյանի անվան ուսումնական բրիգադը: Զորամասի ղեկավարությունը շաբաթական երկու անգամ ճաշի մնացորդներ էր տրամադրում կենդանաբանական այգուն: Սննդի ավելցուկը հնարավորություն էր տալիս սննդով ապահովել այգում կացարան ստացած կենդանիներին: Սակայն արդեն մեկ ամիս է, ինչ զորամասի հրամանատարությունը հրաժարվում է ճաշի մնացորդները տրամադրել կենդանիներին, ինչի արդյունքում կենդանաբանական այգում իրենց ապաստանը գտած բազմաթիվ կենդանիներ կանգնած են սովամահ լինելու վտանգի առջև:

Ս/թ մարտի 20-ին «Երիտասարդ կենսաբանների ասոցիացիա» ՀԿ-ին աջակցության խնդրանքով է դիմել Արմավիր քաղաքի կենդանաբանական այգու ղեկավար Արմեն Թադևոսյանը:

Գիտակցելով խնդրի շուտափույթ լուծման անհրաժեշտությունը` ս/թ մարտի 21-ին «Երիտասարդ կենսաբանների ասոցիացիա» ՀԿ-ն բաց նամակով դիմել է ՀՀ Պաշտպանության նախարար պարոն Սեյրան Օհանյանին, որում նշվում է կենդանաբանական այգու կարևորությունը և ներդրումը Արմավիրի մարզի վտանգված կենդանատեսակների վայրի բնությունից դուրս պահպանման և մարզի բնակչության էկոկրթվածության մակարդակի բարձրացման գործում: Նամակին կից ՀՀ Պաշտպանության նախարարություն է ուղարկվել նաև Արմավիր քաղաքի ավելի քան 600 բնակչի ստորագրությամբ դիմումը: