Հայ ծանրորդուհիներն Անթալիայի ԱԱ-ում 4 հնարավորից նվաճեցին 4 օլիմպիական ուղեգիր

27 սեպտեմբերի 2010 - 12:51 AMT

PanARMENIAN.Net - Սեպտեմբերի 26-ին Անթալիայում ավարտվեց ծանրամարտի աշխարհի առաջնությունը, որում խաղարկվում էին Լոնդոնի օլիմպիական խաղերի ուղեգրեր: Հայաստանի հավաքականը ներկայացնում էին 4 կին և 6 տղամարդ ծանրորդներ:

ԱԱ-ում վերջինը ելույթ ունեցան Եվրոպայի չեմպիոն Գևորգ Պողոսյանը (94 ք/կ) և Արթուր Բաբայանը (104 ք/կ):

Պողոսյանը «պոկում» և «հրում» վարժություններում օգտագործեց միայն մեկ մոտեցումը և համապատասխանաբար բարձրացրեց 170 կգ և 210 կգ: «Երկամարտի» արդյունքում նա հավաքեց 380 կգ և զբաղեցրեց 11-րդ տեղը` Հայաստանի հավաքականին բերելով 15 միավոր: Մինչև 94 ք/կ-ում աշխարհի չեմպիոն դարձավ Ալեքսանդր Իվանովը (Ռուսաստան) 403 կգ-ով:

Արթուր Բաբայանը «պոկում» վարժությունում բարձրացրեց 176 կգ, իսկ «հրում» վարժությունում` 218 կգ և 394 կգ-ով զբաղեցրեց 7-րդ տեղը` հավաքելով 19 միավոր: Ոսկե մեդալ նվաճեց Մարտին Դոլեգան (Լեհաստան) 415 կգ-ով:

Մինչ այդ Հայաստանի հավաքկանին 28 միավոր էր բերել աշխարհի չեմպիոն Տիգրան Մարտիրոսյանը (77 ք/կ) և հավաքականը 62 միավորով զբաղեցրեց 18-րդ տեղը:

Հայաստանի կանանց հավաքականը 80 միավորով զբաղեցրել է 9-րդ տեղը և 4 հնարավորից նվաճել օլիմպիական խաղերի 4 ուղեգրեր: Բրոնզե մեդալակիր դարձավ Մելինե Դալուզյանը (69 ք/կ):

Վարկանիշային է լինելու նաև 2011-ի ԱԱ-ն, որը տեղի է ունենալու Փարիզում նոյեմբերի 10-17-ը: