Հայաստանի դեսպանը հավատարմագրերն է հանձնել Չեխիայի նախագահին

PanARMENIAN.Net - Նոյեմբերի 7-ին Չեխիայում ՀՀ նորանշանակ դեսպան Աշոտ Հովակիմյանն իր հավատարմագրերը հանձնեց Չեխիայի Հանրապետության նախագահ Վացլավ Կլաուսին, հայտնում է ՀՀ ԱԳՆ մամլո ծառայությունը: Չեխիայի նախագահի եւ Հայաստանի դեսպանի միջեւ կայացած զրույցի ընթացքում կողմերը դրական գնահատեցին երկու երկրների ու ժողովուրդների միջեւ հաստատված բարեկամական հարաբերությունները, միաժամանակ հաստատեցին, որ ներկա դրությամբ քաղաքական, տնտեսական, մշակութային ոլորտներում, ինչպես նաեւ մարզերում համագործակցության խթանման ուղղությամբ դեռեւս շատ անելիքներ կան: Զրուցակիցներն անդրադարձան ԵՄ Նոր հարեւանության ծրագրի շրջանակում Հայաստան-ԵՄ Գործողությունների ծրագրի ընձեռած հնարավորությունների սահմաններում համագործակցությանը: Զրույցի ավարտին նախագահ Վացլավ Կլաուսն իր բարեմաղթանքները հայտնեց Հայաստանի նախագահին եւ հաջողություն ցանկացավ ՀՀ նորանշանակ դեսպանին` Չեխիայում իր բարձր առաքելության իրականացման գործում: Չեխիայում գտնվելու ընթացքում դեսպան Հովակիմյանը հանդիպումներ ունեցավ երկրի մի շարք բարձրաստիճան պաշտոնյաների հետ, որոնց ընթացքում քննարկվեց հայ-չեխական երկկողմ հարաբերությունների ներկա վիճակը եւ երկուստեք հաստատագրվեց դրանք խթանելու նպատակով արվելիք միջոցառումների ցանկը: