G20 Գագաթնաժողովը կարող է՞ արդյոք կայանալ առանց Ֆրանսիայի

31 մարտի 2009 - 22:40 AMT

PanARMENIAN.Net - Ֆրանսիայի պատվիրակությունը սպառնացել է լքել այս շաբաթ Լոնդոնում կայանալիք G20 գագաթնաժողովը, եթե չիրականացվեն համաշխարհային ֆինանսական համակարգի եւ շուկաների առավել խիստ վերահսկողության իր պահանջները: Ֆրանսիայի ֆինանսների նախարար Քրիստին Լագարդը հայտարարել է, որ Ֆրանսիայի նախագահ Նիկոլյա Սարկոզին ոչ մի համաձայնագիր չի ստորագրի, եթե համարի, որ ցանկալի արդյունքներ ձեռք չեն բերվել:

Գագաթնաժողովի հիմնական թեմաներից մեկը ֆինանսական վերահսկողության ուժեղացումն է: Ֆրանսիան հանդես է գալիս առավել խիստ վերահսկողության օգտին, քան ԱՄՆ-ն ու Մեծ Բրիտանիան: Եթե Ֆրանսիայի պատվիրակությունը լքի գագաթնաժողովը, ապա դա հարված կլինի ինչպես Բրիտանիայի վարչապետ Գորդոն Բրաունի, այնպես էլ ԱՄՆ-ի նախագահ Բարաք Օբամայի համար: Երկու առաջնորդն էլ հույսեր ունեն, որ գագաթնաժողովի ընթացքում համաշխարհային տնտեսության խթանման միջոցներ կմշակվեն:

Սակայն G20-ի անդամները տարակարծիք են ինչպես համաշխարհային ֆինանսական համակարգի վերահսկողության, այնպես էլ մի շարք այլ տնտեսական խնդիրների լուծմանը մոտեցման հարցում: Մասնավորապես, եվրոպական երկրները չեն ցանկանում ավելացնել պետական ծախսերն այս եւ գալիք տարում: Լյուքսեմբուրգի վարչապետ Ժան-Կլոդ Յունկերը հայտարարել է . «Ճգնաժամը սկսվել է ԱՄՆ-ում: Անգլո-սաքսոնական աշխարհը միշտ հրաժարվել է բարձրացնել ֆինանսական շուկաներին եւ միջազգային ֆինանսական համակարգին անհրաժեշտ վերահսկողության մակարդակը»: «Անգլո-սաքսոնական» տնտեսությունների քննադատությամբ հանդես է եկել նաեւ Նիկոլյա Սարկոզին:

Դրա հետ մեկտեղ, Գերմանիայի կանցլեր Անգելա Մերկելը հայտարարել է, որ բարձր են օրինակ` վենչուրային ներդրումների հիմնադրամների վերահսկողության շուրջ, այնուամենայնիվ, պայմանավորվածության ձեռքբերման շանսերը, հաղորդում է BBC-ին: