Ստեփանակերտում մեկնարկել է ատլետիկական բազմամարտի գծով ԼՂՀ Ազգային ժողովի փոխանցիկ գավաթի հերթական խաղարկությունը:

PanARMENIAN.Net - Մայիսի 7-ին Ստեփանակերտի մարզադաշտում մեկնարկ վերցրեց ատլետիկական բազմամարտի գծով ԼՂՀ Ազգային ժողովի փոխանցիկ գավաթի հերթական խաղարկությունը: Այդ մասին նշվում է ԼՂՀ ԱԺ մամլո ծառայության հաղորդագրության մեջ:

Ավանդական դարձած այդ մարզական միջոցառումը կազմակերպվել է խորհրդարանի եւ կառավարության համատեղ ջանքերով` ի դեմս ԱԺ սոցիալական ոլորտի հարցերի մշտական հանձնաժողովի, կրթության ու գիտության նախարարության եւ սպորտի պետական կոմիտեի:

Խաղարկությանը մասնակցելու իրավունք են նվաճել միջդպրոցական մրցություններում հաղթող ճանաչված Ստեփանակերտի Խաչատուր Աբովյանի անվան թիվ 1, Ասկերանի Էդմոն Բարսեղյանի անվան, Մարտունու շրջանի Սոս գյուղի Հայկ Հակոբյանի անվան, Հադրութի շրջանի Մեծ Թաղեր գյուղի Արմենակ Խամփերյանցի անվան, Շուշիի Խաչատուր Աբովյանի անվան եւ Մարտակերտի Վլադիմիր Բալայանի անվան թիվ 1 միջնակարգ հանրակրթական դպրոցների 3-6-րդ դասարանցիներին ընդգրկող թիմերը:

Միջոցառմանը ներկա էին դպրոցականներ եւ պարզապես մարզասերներ, ինչպես նաեւ երկրի օրենսդիր ու գործադիր իշխանությունների ներկայացուցիչներ:

Գավաթի խաղարկության հանդիսավոր բացմանը ողջույնի եւ բարեմաղթանքի խոսքով դիմելով դպրոցական մարզիկներին, ԼՂՀ ԱԺ նախագահ Աշոտ Ղուլյանը կարեւորեց այդ ամենամյա մարզական միջոցառումը` որպես մատաղ սերնդի ֆիզիկական պատրաստության, կամքի ու տոկունության փորձություն եւ հաջողություն մաղթեց բոլոր մասնակիցներին:

ԼՂՀ ԱԺ փոխանցիկ գավաթի խաղարկությունը կտեւի երկու օր եւ եզրափակիչը կհատի մայիսի 8-ին: