«Ցեղասպանության որբերը» ֆիլմը ներկայացվել է «Էմմի»-ի տարածաշրջանային մրցանակաբաշխությանը (վիդեո)

28 հոկտեմբերի 2014 - 16:48 AMT

PanARMENIAN.Net - Բարեդ Մարոնյանի «Ցեղասպանության որբերը» ֆիլմը Հեռուստատեսային արվեստի ու գիտության ազգային ակադեմիայի կողմից նոմինացվել է 2014-ի Սանքոսթ տարածաշրջանի «Էմմի» մրցանակաբաշխության վավերագրական-պատմական ֆիլմերի անվանակարգում:

Սա 38-րդ ամենամյա Սանքոսթ «Էմմի» մրցանակաբաշխությունն է, որում տարածաշրջանային «Էմմի» մրցանակի համար 3 տարի առաջ նոմինացվել էր նաև «Ցեղասպանության որբերը» ֆիլմի 7-րոպեանոց տարբերակը:

«Ցեղասպանության որբերը» պատմական արխիվները շաղկապում է հայ որբերի հիշողությունների ու հարցազրույցների հետ` ստեղծելով Հայոց ցեղասպանության անհերքելի ապացույց: Նախկինում երբեք չցուցադրված արխիվային տեսանյութերով ու նախորդ դարի առաջին, լիովին վավերագրված, բայց թերի ճանաչված 1915-ի ցեղասպանությունն ապրած հայ որբերի հիշողությունների ուղեկցությամբ հուզական ճամփորդությունը «Ցեղասպանության որբերում» զուգորդվում է այնպիսի նշանավոր գիտնականների ու քաղաքական գործիչների հետ հարցազրույցներով, ինչպիսիք են բրիտանացի լրագրող Ռոբերտ Ֆիսկը, Քլարքի համալսարանի պրոֆեսոր Դեբորա Դուորքը, ամերիկահայ դոկտոր Ջեք Կևորկյանը:

Նախորդ 2 տարիների ընթացքում «Ցեղասպանության որբերը» ցուցադրվել է PBS հեռուստաալիքով` ունենալով ավելի քան 12 մլն հանդիսատես: Այն արդեն իսկ մասնակցել է բազմաթիվ կինոփառատոների ԱՄՆ-ում, Կանադայում, Եվրոպայում, Միջին Արևելքում ու Հվ. Ամերիկայում` արժանանալով տասնյակ մրցանակների:

Եղեռնի մասին առաջին ֆիլմը` «Հոգիների աճուրդը», նկարահանվել է 1919-ին Հոլիվուդում: Թեմային է անդրադարձել նաև կանադահայ կինոռեժիսոր Ատոմ Էգոյանը՝ 2002-ին նկարահանելով իր «Արարատը»: Թեմային անդրադարձ կան նաև Էլիա Քազանի «Ամերիկա, Ամերիկա» ու Անրի Վերնոյի «Մայրիկ» ֆիլմերում: 2007-ին Բեռլինի կինոփառատոնում Տավիանի եղբայրները ներկայացրեցին թեմային անդրադարձող ևս մեկ ֆիլմ` «Արտույտների ագարակը»:

Հղումներ թեմայով.

Asbarez. ‘Orphans of the Genocide’ Nominated for Regional Emmy Award

Հայոց ցեղասպանության մասին գեղարվեստական ֆիլմերը

1915՝ «Արյունոտ Արևելք», ռեժ.` Ա. Արկատով,
1915՝ «Քրդերի իշխանության տակ» (Թուրքական Հայաստանի ողբերգությունը). ռեժ.` Ա. Միներվին,
1919՝ «Հոգիների աճուրդը» (Ravished Armenia), ռեժ.` Օ. Ափվելը ,
1928՝ «Անդրանիկ», ռեժ.` Ա. Շահխաթունի,
1960՝ «Հյուսիսային ծիածան», ռեժ.` Ա. Հայ-Արտյան
1963՝ «Ամերիկա, Ամերիկա» (America America) ռեժ.` Է. Քազան
1969՝ «Սարոյան եղբայրներ», ռեժ.` Խ. Աբրահամյան, Ա. Հայրապետյան
1970՝ «Գարուն ա, Ձյուն ա արել», ռեժ.` Գ. Մելիք-Ավագյան
1970՝ «Կոմիտաս Վարդապետի կյանքն ու երգերը», ռեժ.` Զ. Էլմասյան
1972՝ «Կրակեցեք դաշնակահարի վրա», ռեժ.` Ֆ. Տրյուֆո
1974՝ «Պատը», ռեժ.` Յ. Գյունեյ
1975՝ «Կեսգիշերային ճեպընթաց», ռեժ.` Ա. Փարկեր
1977՝ «Նահապետ», ռեժ.` Հ. Մալյան
1977՝ «Երկունք», ռեժ.` Ֆ․ Դովլաթյան
1977՝ «Քարե հովիտ», ռեժ.` Ա. Մկրտչյան
1979՝ «Ձորի Միրո», ռեժ.` Ժ. Ավետիսյան
1981՝ «Գործուղում առողջարան». ռեժ.` Ա. Հայրապետյան
1981՝ «Մուսա լեռան 40 օրը», ռեժ.` Ջ. Քյուրքչյան,
1982՝ «Մուսա լեռան 40 օրը», ռեժ.` Ս. Մուրադյան,
1982՝ «Առաքելություն ի Բեռլին», ռեժ.` Հ. Թուխանյան,
1983՝ «Գիշերում առկայծող կրակ», ռեժ.` Ռ. Գևորգյանց, Գ. Կևորկով,
1985՝ «Ապրիլ», ռեժ.` Վ. Չալդրանյան,
1985՝ «Մի հայի օրագիր», ռեժիսորների խումբ
1986՝ «Զոհը», ռեժ.` Հ. Լինդեր
1988՝ «Հրաժեշտի հինգ նամակ», ռեժ.` Յու. Երզնկյան
1988՝ «Մուսա լեռ-88. Վիշապի տարի», ռեժ.` Ա. Վահունի
1988՝ «Երթ», ռեժ.` Է. Իսահակյան
1988՝ «Կոմիտաս», ռեժ.` Դ. Ասկարյան
1990՝ «Կարոտ», ռեժ.` Ֆ. Դովլաթյան
1991՝ «Մայրիկ», ռեժ.` Ա․ Վերնոյ,
2002՝ «Արարատ», ռեժ.` Ա. Էգոյան,
2007՝ «Արտույտների ագարակը» (La Masseria Delle Allodole), ռեժ.` Վիտտորիո և Պաոլո Տավիանի եղբայրներ,
2009՝ «Հոգիների աճուրդը» (Ravished Armenia) (1919-ին նկարահանված ֆիլմի վերականգնված ու վերամոնտաժված տարբերակը),
2010՝ «Շների կղզին», ռեժ.` Ս․ Ավեդիքյան,
2011՝ «Վանա ծովուն արշալույսը», ռեժ.` Ա․ Իգիթյան, Վ․ Ստեփանյան,
2014՝ «Սպին» (The Cut, ռեժ․՝ Ֆ․ Ակին։