The Independent. Քեսաբի վրա հարձակումը գլխավորել են չեչեն ու ամերիկացի ծայրահեղականները14 ապրիլի 2014 - 11:47 AMT PanARMENIAN.Net - Սիրիայի դեմ հարձակումն իրականացվում է ոչ միայն նրա կարևոր աշխարհաքաղաքական դիրքի, այլ նաև տարածաշրջանում առանցքային պատմական դերի և արաբ ժողովրդի վրա մեծ ազդեցության համար: Այդ մասին հայտարարել է Սիրիայի նախագահ Բաշար Ասադը Դամասկոսում: Ըստ նրա, այն, ինչ կատարվում է Սիրիայում, փորձ է ազդել նրա ինքնիշխան որոշման վրա ու թուլացնել երկիրը, ստիպելու համար փոխել նրա քաղաքական կուրսը, ելնելով ԱՄՆ ու Արևմուտքի շահերից, որին, սակայն հավանություն է տալիս ժողովուրդը: Նախագահ Ասադը նշել է, որ այժմ բեկումնային պահ է՝ ռազմական առումով Սիրիայի բանակն ու զինված ուժերը շարունակում են հաջողություններ գրանցել ահաբեկչության դեմ պայքարում, իսկ սոցիալական առումով ընդլայնվում է ազգային հաշտեցման գործընթացը և աճում է ժողովրդի կողմից հակասիրիական ագրեսիայի իսկական պատճառների գիտակցումը, հայտնում է սիրիական SANA գործակալությունը: Ասադը հայտարարել է, որ իշխանությունները ձգտում են վերականգնել անվտանգությունն ու կայունությունն այն շրջաններում, որոնք ենթարկվել են ահաբեկիչների գրոհներին, որպեսզի հետո ձեռնամուխ լինեն ահաբեկչության «քնած օղակների» ոչնչացմանը: Իր հերթին, հայտնի բրիտանացի հրապարակախոս Պատրիկ Քոքբերնը The Independent-ում հրապարակված հոդվածում հաստատել է, որ ԱՄՆ ԿՀՎ-ն, բրիտանական հետախուզությունը և Թուրքիայի կառավարությունն Էրդողանի գլխավորությամբ համատեղ ծրագիր են իրականացնում Սիրիայի դեմ: Ինչպես նշել է Քոքբերնը, չնայած առկա ապացույցներին, որ ծայրահեղական գրոհայինները վերահսկում են սիրիական ընդդիմությունը և կիրառում են ահաբեկչական «Ալ Քայիդայի» մեթոդները, ԱՄՆ պետքարտուղար Ջոն Քերին և ՄԱԿ-ում ԱՄՆ ներկայացուցիչ Սամանտա Փաուերը ձգտում են ավելացնել աջակցությունը զինյալներին Սիրիայում: Քոքբերնը գրում է, որ հարձակումը սիրիական Քեսաբի վրա գլխավորել են չեչեն ու ամերիկացի գրոհայինները, ընդ որում, ԱՄՆ-ն ամեն ինչ արեց գաղտնի պահելու համար իր մասնակցությունն ավազակախմբերին զինելու գործում կեղծ ընկերությունների ու գործակալությունների միջոցով: «Թուրքական հատուկ ծառայությունները սատարում են «Ջեբհաթ ան Նուսրա» խմբավորմանը, որը, հնարավոր է, կանգնած է 2013 թ. օգոստոսի 21-ին Արևելյան Գուտայում քիմիական գրոհի ետևում: ԱՄՆ-ն, Թուրքիան, Սաուդյան Արաբիան ու Քաթարը գրոհայիններին զենքով մատակարարելու ցանց են ստեղծել՝ զենքը առաքելով Լիբիայի ու Թուրքիայի տարածք, իսկ հետո Սիրիայի ավազակախմբերին: Կան փաստաթղթեր, որոնք հաստատում են, որ 2013 թվականին համաձայնություն ձեռք բերվեց ԱՄՆ նախագահ Բարաք Օբամայի, թուրք վարչապետ Էրդողանի, Սաուդյան Արաբիայի ու Քաթարի միջև զենքի մատակարարումների ֆինանսավորման վերաբերյալ: Հենց այդ նպատակով ստեղծվեցին կեղծ ընկերություններ, իբր ավստրալական, որտեղ աշխատում են նախկին ամերիկյան զինվորներ, նրանք զբաղվում են զենքի մաքսանենգ փոխադրումներով գրոհայիններին», - գրում է The Independent-ը: Մարտի 21-ին, խախտելով բոլոր միջազգային իրավունքներն ու նորմերը, թուրքական կողմը գնդակոծեց Սիրիայի հայաբնակ գյուղերն ու ավանները, իսկ հետո ճանապարհ բացեց գրոհայինների համար, որպեսզի նրանք գրավեն հայկական բնակավայրերը: Գրոհայինների հարձակումից հետո մոտ 400 հայ ընտանիքներ (այլ տվյալներով մոտ 600 ընտանիք) Քեսաբից տարհանվել ու ապաստանել են Լաթակիայում, իսկ մի քանի մարդու ճակատագիրն անհայտ է մնում: Ապստամբները պղծել են Քեսաբի եկեղեցին, թալանել տներն ու քանդել մի շարք կառավարական շենքեր: Զոհեր Քեսաբի հայերի թվում չկան: Ապստամբներն ու նրանց արևմտյան ու արաբ դաշնակիցները 2013 թվականի օգոստոսի 21-ի քիմիական գրոհի մեղքը բարդում են Բաշար Ասադի վրա: Սիրիայի կառավարությունը պնդում է, որ քիմիական զենքը ապստամբներն են օգտագործել: ԱՄՆ-ն ևս Բաշար Ասադին է մեղադրում և պնդում է, որ Արևելյան Գուտայում 1400 մարդ է մահացել, ըստ ապստամբների տվյալների: Ըստ «Բժիշկներ առանց սահմանների» կազմակերպության, օգոստոսի 21-ին մոտ 400 մարդ է զոհվել: 2013 թվականի օգոստոսի 28-ին թուրքական Vatan թերթի կայքում տեսանյութ զետեղվեց «Սիրիացի իսլամիստների համար քիմիական զենքը պատրաստվում է Թուրքիայում» վերտառությամբ: Թերթը գրում է, որ մինչդեռ Արևմուտքը պատրաստվում է հարված հասցնել Սիրիային նախագահ Ասադին քիմիական զենքի կիրառման համար պատժելու նպատակով, սույն տեսանյութը պետք է գրավի բոլոր նրանց ուշադրությունը, ով պատրաստվում է ռմբակոծել Սիրիան: Ռեակտիվներով տարաների վրա պարզ երևում են թուքերենով արված գրությունները: Քաղաքացիական պատերազմը Սիրիայում շարունակվում է արդեն 3 տարի: Ըստ ՄԱԿ-ի, այդ ընթացքում զոհվել է մոտ 125 հազար մարդ, 2 միլիոնը փախստական է դարձել, ևս 4 միլիոնը՝ ներքին տեղահանված անձիք են: Այժմ պայքար է գնում ինչպես կառավարական ուժերի ու ընդդիմության, այնպես էլ իսլամիստական խմբավորումների ներսում: Իսլամիստների նպատակն է ստեղծել շարիաթի օրենքներով ապրող պետություն: «Ջաբհաթ ան Նուսրան» ահաբեկչական կազմակերպություն է, որը ստեղծվել է 2012 թ. հունվարի 23-ին Սիրիայում քաղաքացիական պատերազմի ժամանակ: Այն «Ալ Քայիդայի» սիրիական ստորաբաժանում են կոչում, կազմակերպության անդամները ժխտում են դա, բայց հաստատում են, որ հավատարիմ են «Ալ Քայիդայի» առաջնորդ Այման ազ Զավահիրիին: Սկզբնական շրջանում կազմակերպությունը գործակցել է Սիրիայի Ազատ բանակի հետ, որը դեմ է երկրի գործող կառավարությանը: Ճակատի անդամները սունիներ են: Նրա շարքերում կռվում են սիրիացիներ, ինչպես նաև Սաուդյան Արաբիայի, Իրաքի, Պակիստանի, Լիբանանի, Թուրքմենստանի, Ֆրանսիայի, Մեծ Բրիտանիայի քաղաքացիներ, որոնք միավորված են սալաֆիտների գաղափարախոսությամբ, որը կոչ է անում իսլամական պետություն կառուցել ոչ միայն Սիրիայում, այլև ամբողջ իսլամական աշխարհում: Կազմակերպության առաջնորդները նախատեսում են Սիրիայում պատերազմի ավարտից հետո գրոհել Իսրայելը: Ընթացիկ տարվա մայիսին ՄԱԿ ԱԽ-ն «Ալ Քայիդայի» միջազգային ահաբեկչական ցանցի հետ կապերի համար «Ջաբհաթ ան Նուսրա» ընդդիմադիր խմբավորումն ընդգրկեց ահաբեկչական կազմակերպությունների ցանկում: 2012թ. դեկտեմբերի սկզբին «Ջաբհաթ ան Նուսրան» ընդգրկվեց ԱՄՆ ահաբեկչական կազմակերպությունների ցանկում: Ուշագրավ Այցն աշխատանքային է Գերատեսչությունը հայտնել է նաև գերիների թիվը՝ 511 զինծառայող 7 1 քաղաքացիական Կավելացվեն ծախսերը նաև հատուկ նշանակության նախագծերի ֆինանսավորման համար
Շատերը զրկվել են տանիքից և գիշերում են փողոցում Ամենաընթերցվողը բաժնում | Թաթոյան․ Կիրանցը նեղ թերակղզու նմանությամբ գրեթե ամբողջությամբ շրջափակված է լինելու ադրբեջանական զորքերով Արոտավայրերը, այգիները, այլ հողեր հայտնվելու են ադրբեջանական վերահսկողության կամ թիրախի ներքո Մեծ Բրիտանիայի քրիստոնյա առաջնորդները նամակով դիմել են կառավարությանը Հայոց ցեղասպանությունը ճանաչելու կոչով Սունակին ուղղված նամակում նաև անդրադարձ է կատարվում Լեռնային Ղարաբաղում տեղի ունեցած իրադարձություններին Ֆրանսահայ լրագրող Նիկոլյանը, որի մուտքը ՀՀ արգելվել է, չի պատրաստվում դադարեցնել հացադուլը Նա պահանջում է, որ իրեն գրավոր ներկայացնեն, թե ինչու իրեն թույլ չեն տալիս մուտք գործել Հայաստան Վանաձորի նախկին ղեկավար Ասլանյանը կմնա կալանքի տակ Դատարանը մերժել է միջնորդությունը |