Կատալոնացիների գրեթե 60 տոկոսը կողմ է անկախությանը

Կատալոնացիների գրեթե 60 տոկոսը կողմ է անկախությանը

PanARMENIAN.Net - Կատալոնացիների գրեթե 60 տոկոսը կողմ է անկախության հռչակմանը: Այդ մասին, ըստ ՌԻԱ Նովոստի գործակալության, վկայում են հարցման արդյունքները, որ անցկացրել է Omnibus հասարակական կարծիքի հետազոտման կենտրոնը:

Ըստ հարցման տվյալների, մասնակիցների 58 տոկոսը «լիովին» կամ «հիմնականում» համաձայն է, որ Կատալոնիան դառնա պետություն, 31,9 տոկոսը դեմ է: 30 տոկոսը հայտարարել է, որ ընդհանրապես չի վախենում անկախության հեռանկարից, գրեթե 11 տոկոսը պատասխանել է, որ «շատ է վախենում»: Հարցման մասնակիցների 87,9 տոկոսը հայտարարում է, որ կճանաչի հանրաքվեի արդյունքները, և միայն 9 տոկոսը՝ ոչ չի ճանաչի: Հարցմանը մասնակցել է 1,6 հազար մարդ:

Ավելի վաղ Կատալոնիայի խորհրդարանը հավանություն էր տվել բնակչության հարցումների անցկացման վերաբերյալ օրենքին, որն, ըստ ազգայնական ուժերի, իրավական ուժ է ստեղծում նոյեմբերի 9-ին Իսպանիայի այդ ինքնավար մարզի ինքնիշխանության մասին հարցման համար:

Ավելի վաղ Կատալոնիայի խորհրդարանն օրենք ընդունեց ձայների գերակշիռ առավելությամբ՝ 106 «կողմ» և 28՝ «դեմ»: Իսպանիայի կառավարությունը բազմիցս է զգուշացրել, որ օրենքը հակասում է Իսպանիայի սահմանադրությանը, որ այն բողոքարկվելու է Սահմանադրական դատարանում: Առաջիկայում տեղի կունենա նախարարների խորհրդի նիստը, որտեղ որոշում կկայացվի Սահմանադրական դատարան հայց ներկայացնելու մասին: Հենց որ հայցն ընդունվի դիտարկման, Կատալոնիայի խորհրդարանի ընդունած օրենքի գործողությունը կասեցվում է, ինչն անհնար է դարձնում հանրաքվեի անցկացումը: Սակայն կատալոնացի ազգայնականները կարծում են, որ Սահմանադրական դատարանի որոշումը չի կարող վեր լինել սեփական ճակատագիրն որոշելու ժողովրդի իրավունքից:

Եթե, այնուամենայնիվ, հանրաքվե անցկացվի, ապա մասնակիցներին հարկ կլինի պատասխանել երկու հարցի՝ «Համաձա՞յն եք, որ Կատալոնիան պետություն դառնա» (ինքնավարության կարգավիճակի բարձրացում) և «Եթե այո, ապա համաձա՞յն եք, որ Կատալոնիան անկախ պետություն դառնա» (անկախանա Մադրիդից):

Անկախության գաղափարն արմատավորված է կատալոնացիների շրջանում, որոնք միլիոնանոց հանրահավաքներ են կազմակերպում հօգուտ անկախության:Կատալոնացիները պայքարում են անկախության համար արդեն 200 տարի՝ փաստացի, 1714 թ. Բարսելոնայի ճակատամարտում պարտվելուց հետո Իսպանիայի կազմի մեջ մտնելու պահից: Այդ ժամանակներից ի վեր արդեն 3 դար է պայքար է գնում անկախության համար: 1979 թ. Կատալոնիան ինքնավարություն ստացավ, այն ժամանակ էլ պաշտոնապես ճանաչվեց կատալոնական լեզվի գոյությունը: Տարածաշրջանի տնտեսական հաջողությունները նպաստում են անջատողական տրամադրություններին՝ 203 մլրդ եվրո ՀՆԱ-ն մոտավորապես համարժեք է Դանիայի կամ Ֆինլանդիայի տնտեսություններին, իսկ մեկ շնչի համար ՀՆԱ-ն այստեղ ավելի բարձր է, քան միջինը Իսպանիայում ու ԵՄ-ում: Տարածաշրջանի արտահանումը ընդհանուր իսպանական արտահանման 26 տոկոսն է կազմում, այդ թվում արտահանման 65 տոկոսը բաժին է ընկնում ԵՄ երկրներին: Տարածաշրջանում է գրանցված Իսպանիայում գործող բոլոր օտարերկրյա ընկերությունների 38 տոկոսը:

Տարածաշրջանի բնակչությունը մոտ 7,5 միլիոն է, տարածքը՝ մոտ 32 հազար քառակուսի կիլոմետր: Անջատողական տրամադրություններն ուժեղ են նաև Իսպանիայի այլ տարածաշրջաններում՝ Բասկերի Երկրում ու Անդալուսիայում:

 Ուշագրավ
Գերատեսչությունը հայտնել է նաև գերիների թիվը՝ 511 զինծառայող 7 1 քաղաքացիական
Կավելացվեն ծախսերը նաև հատուկ նշանակության նախագծերի ֆինանսավորման համար
---