«Արա Գյուլեր. Ստամբուլի աչքը». Բեռլինում բացվել է պոլսահայ ֆոտոլրագրողի հետահայաց ցուցհանդեսը

 20 հոկտեմբերի 2014 - 15:31 AMT

PanARMENIAN.Net - Հոկտեմբերի 15-ին Բեռլինի Willy-Brandt-Haus-ում բացվել է «Արա Գյուլեր. Ստամբուլի աչքը» խորագրով ցուցահանդեսը: Գերմանիայի նախկին կանցլեր Բրանդին նվիրված ժամանակակից շենքի 2 հարկում միաժամանակ ցուցադրված է ավելի քան 200 լուսանկար, որոնք արվել են 1950-2005 թվականներին:

Լուսանկարների մեծ մասը, որոնցից շատերը սև-սպիտակ են, արվել են Ստամբուլի ծայրամասերում ու ցույց են տալիս դրանց բնակիչների առօրյա կյանքը, իսկ հետնամասում հիմնականում երևում են Ստամբուլի ջրային ուղիները: Ընդհանուր առմամբ ցուցահանդեսը ներկայանում է որպես հիշարժան ու պատմական զբոսանք քաղաքում մինչև դրա վերջին մոդեռնիզացումները:

Today's Zaman-ի փոխանցմամբ, ցուցահանդեսում կարելի է տեսնել ինչպես Ստամբուլի խարխուլ ետնախորշերի մռայլ, սև-սպիտակ տեսարանները, մարդկանց անձնական պահերին արված հանելուկային լուսանկարներ, այնպես էլ ահաբեկչության և Թաքսիմ հրապարակում ռազմական հեղաշրջումների մասին ականատեսի անհողդողդ արձանագրությունները:

Նաև ներկայացված են գունավոր լուսանկար, որոնք արվել են Քենիայում, Պակիստանում, Նեպալում, Պաղեստինում, Եգիպտոսում, Իրանում ու Հնդկաստանում:

Արա Գյուլերն աշխարհահռչակ պոլսահայ լուսանկարիչ-լրագրող է: Հաճախ նրան դիմում են «Ստամբուլի աչք» կամ «Ստամբուլի լուսանկարիչ» մականուններով: Ծնվել է Ստամբուլում՝1928-ին, հայերի ընտանիքում: 1950-ից սկսել է աշխատել Yeni Istanbul թերթում`զուգահեռ ուսանելով Ստամբուլի համալսարանի տնտեսագիտական ֆակուլտետում: Որոշ ժամանակ անց տեղափոխվել է «Հյուրիեթ» թերթի խմբագրություն: Գյուլերը լուսանկարել է Ուինսթոն Չերչիլին, Մարիա Կալլասին, Ջոն Բերգերին, Բերնարդ Ռասսելին, Սալվադոր Դալիին, Պաբլո Պիկասոյին, Ինդիրա Գանդիին, Սերգեյ Փարաջանովին և այլոց: Պարգևատրվել է ֆրանսիական Legion d’ honneur, 2005թ.` թուրքական Grand prize of culture and art, 2009թ.` Նյու Յորքի Lucie Award մրցանակներով:

2013-ի ամռանն Արա Գյուլերը Հայաստանում էր: Ազգային պատկերասրահում նրա «Բարև ձեզ» խորագրով ցուցահանդեսն էր, որտեղ ներկայացված էր աշխարհի տարբեր վայրերում արված մոտ 100 լուսանկար: