Պերմյակովի հոգեկան շեղումների մասին խոսակցություններն ասեկոսեներ են. Փորձաքննության արդյունքները դեռ հայտնի չեն

5 մարտի 2015 - 11:50 AMT

PanARMENIAN.Net - Գյումրիում Ավետիսյանների ընտանիքի 7 անդամների սպանության մեջ մեղադրվող ռուս զինծառայող Վալերի Պերմյակովի դատահոգեբուժական փորձաքննություն է նշանակվել, հայտնում է Ինտերֆաքսը իրազեկ աղբյուրի վրա հղումով:

«Փորձաքննությունը անցկացվում է ստացիոնար Հայաստանում տեղակայված 102-րդ ռուսական ռազմակայանի տարածքում և պետք է ավարտվի մոտավորապես 2 շաբաթից»,-ասել է գործակալության զրուցակիցը: Ըստ նրա, փորձագետները պետք է գնահատեն Պերմյակովի հոգեկան վիճակը և ախտորոշում ներկայացնեն: Բոլոր խոսակցություններն այն մասին, որ Պերմյակովի մոտ հոգեկան շեղումներ են հայտնաբերվել, զուտ ասեկոսեներ են: Փորձաքննության արդյունքները դեռ հայտնի չեն»,-ասել է նա:

Նա նշել է, որ «քննությունը ընթանում է երկու երկրների իրավապահների սերտ համագործակցությամբ»՝ հերքելով որոշ ԶԼՄ-ների ենթադրություններն այն մասին, թե ռուսական կողմը չի ցանկանում, որ Պերմյակովի գործն արագ քննվի ու հասնի դատարան: «Ոչ մի քաշքշուկ չկա, բոլոր քննչական միջոցառումները ժամանակին են անցկացվում»,-ասել է աղբյուրը:

Ավելի վաղ Ավետիսյանների ընտանիքի իրավահաջորդների փաստաբան Երեմ Սարգսյանը հայտարարել էր, որ Վալերի Պերմյակովի դատահոգեբուժական փորձաքննություն հայկական կողմը չի նշանակել:

«Պաշտոնական տեղեկություն, որ Պերմյակովը փորձաքննության արդյունքում մեղսունակ է ճանաչվել, չունեմ։Հայկական կողմը նման փորձաքննություն չի նշանակել։ Հավանաբար, խոսքը ռուսական կողմի մասին է։ Հնարավոր է, փորձաքննությունը նշանակել էին ռուս քննիչները: Ես նույնպես նման տեղեկություններ ունեմ, բայց ոչ պաշտոնապես»,-ասել էր նա:

Հունվարի 12-ին Գյումրիում հայտնաբերվեցին Ավետիսյանների ընտանիքի 6 անդամի դիերը: Ընտանիքի մյուս երեխան՝ 6-ամսական Սերյոժա Ավետիսյանը, ծանր մարմնական վնասվածքներով տեղափոխվել էր հիվանդանոց, որտեղ վիրահատվեց։ Չնայած բժիշկների ջանքերին, երեխային փրկել չհաջողվեց, փոքրիկը մահացավ հունվարի 19-ին: Հայ-թուրքական սահմանը հատելու փորձի ժամանակ հայտնաբերված կասկածյալ Վալերի Պերմյակովին մեղադրանք առաջադրվեց, նա ընդունել է իր կատարած հանցանքը: Նրան տեղափոխեցին ռուսական ռազմակայան, ինչը բողոքի մեծ ալիք բարձրացրեց:

Ավետիսյանների ընտանիքի սպանության մեջ կասկածվող Վալերի Պերմյակովին մեղադրանք է առաջադրվել ՌԴ ՔՕ 105-րդ հոդվածի 2-րդ (սպանություն) և 338-րդ հոդվածի 2-րդ մասի (դասալքություն) հատկանիշներով, որպես խափանման միջոց ընտրված է կալանքը: Միաժամանակ, որոշում է կայացվել Վալերի Պերմյակովին որպես մեղադրյալ ներգրավել ՀՀ ՔՕ 104-րդ հոդվածի 2-րդ մասի 1-ին կետով (այն է՝ երկու կամ ավելի անձանց սպանություն, ինչը պատժվում է 8-ից 15 տարի ժամկետով կամ ցմահ ազատազրկմամբ) հարուցված քրգործով:

Իսկ հունվարի 19-ին Գյումրիի քաղաքապետարանը ՀՀ գլխավոր դատախազ Գևորգ Կոստանյանին ուղերձ էր հղել, որում, մասնավորապես, նշվում էր՝ ակնկալվում է Կոստանյանի միջնորդությունը, որպեսզի հանցագործության նախաքննությունը հանձնվի հայ իրավապահներին, որոնք կապահովեն գործի քննության արդարացիությունը և թափանցիկությունը, իսկ դատավարությունը տեղի ունենա Հայաստանի Հանրապետությունում:

Ձեռնարկվել են քննչական, դատավարական և օպերատիվ-հետախուզական այլ միջոցառումներ: Վալերի Պերմյակովին քրեական գործով որպես մեղադրյալ ներգրավելու մասին որոշում է կայացվել: Մեղադրյալն ընդունել է առաջադրված մեղադրանքը:

ՀՀ գլխավոր դատախազ Գևորգ Կոստանյանը, ղեկավարվելով ՀՀ և ՌԴ միջև ՀՀ տարածքում ռուսաստանյան ռազմական բազայի գտնվելու հետ կապված գործերով իրավասության և փոխադարձ իրավական օգնության հարցերի վերաբերյալ Համաձայնագրի 6-րդ հոդվածով, հունվարի 12-ին Գյումրի քաղաքում ՀՀ յոթ քաղաքացիների սպանության դեպքի առթիվ հարուցված քրեական գործի վարույթը ՀՀ իրավապահ մարմիններին փոխանցելու վերաբերյալ միջնորդությամբ դիմել է ՌԴ գլխավոր դատախազ Յու. Չայկային:

ՀՀ գլխավոր դատախազության միջնորդությունն այժմ քննարկվում է ՌԴ գործընկերների կողմից: Միջնորդության շուրջ ստեղծված թյուրըմբռնումներից խուսափելու համար հրապարակվեց դրա վերաբերյալ ՀՀ գլխավոր դատախազության միջազգային-իրավական կապերի բաժնի կողմից ՌԴ գլխավոր դատախազություն ուղարկված հարցման պատասխանի լուսապատճենը:

Հղումներ թեմայով.

Интерфакс: Обвиняемому в убийстве семьи из Гюмри назначили судебно-психиатрическую экспертизу