Հունաստանի բանկերը մինչև հուլիսի 6-ը փակ կլինեն. Հուլիսի 5-ին հանրաքվե է նշանակված

29 հունիսի 2015 - 11:10 AMT

PanARMENIAN.Net - Հունաստանի կառավարությունը հայտարարել է մինչև հուլիսի 6-ը բանկերի աշխատանքը պաշտոնապես դադարեցնելու մասին, ինչպես նաև բանկերից կանխիկ գումար հանելու ամենօրյա լիմիտը սահմանել 60 եվրոյի սահմանում մեկ անձի համար, ասվում է որոշման մեջ, որը հրապարակվել է կառավարական թերթում հունիսի 29-ին:

«Բանկերի աշխատանքի կասեցումը» որոշման մեջ թվարկվում են այն միջոցները, որոնք ձեռնարկվել են ֆինանսական կազմակերպությունների հանդեպ հունիսի 28-ից մինչև հուլիսի 6-ը: Որոշումը ստորագրել է Հունաստանի նախագահ Պրոկոպիս Պավլոպուլոսը և երկրի վարչապետ Ալեքսիս Ցիպրասը, հայտնում է «Ֆրանս Պրես» գործակալությունը:

Այդ քայլի պատճառը «Հունաստանի ֆինանսական համակարգն ու տնտեսությունը պաշտպանելու արտակարգ շտապ ու անկանխատեսելի անհրաժեշտությունն է լիկվիդայնության պակասի պատճառով, որի պատճառը հունիսի 27-ի Եվրախմբի որոշումն է` մերժել Հունաստանին աջակցության ծրագիրը երկարացնելու հարցում», ասվում է որոշման մեջ, հայտնում է ՌԻԱ Նովոստի գործակալությունը:

Հունաստանում հուլիսի 5-ին կանցնի հանրաքվե միջազգային վարկատուների մասին համաձայնագրի շուրջ: Հանրաքվեին հարց է դրվում վերաբերմունքի մասին համաձայնագրի նախագծին վերաբերմունքի մասին: Համաձայնագիրը ներկայացրել են Եվրահանձնաժողովը, Եվրոպական կենտրոնական բանկը և Միջազգային արժութային հիմնադրամը 2015-ի հունիսի 25-ին Եվրախմբի նիստում:

Հունաստանի իշխանությունները մի շարք զիջումների են գնացել: Մասնավորապես, Աթեքնը համաձայնվել է բարձրացնել կենսաթոշակային տարիքը մինչև 2022 թ., ոչ թե 2025 թ., ինչպես նախկինում էր ենթադրվում: Հունաստանը նաև որոշել է «փոխարինել» թոշակառուների դրամաշնորհային համակարգը 2 տարով ավելի շուտ` 2018-ին: Մյուս հարցերում Աթենքն ու վարկատուները նախկինի պես հեռու են համաձայնությունից:

Հունաստանն ու նրա վարկատուները արդեն մի քանի ամիս է բանակցում են երկրում բյուջեի տնտեսման ու բարեփոխումների ծրագրի շուրջ: Համաձայնության գալու վերջին ժամկետը հունիսի 30-ն է: Հետո ծրագիրն այլևս չի գործի և մնացած 7,2 մլրդ եվրոն այլևս չի հատկացվի Հունաստանին: Հունիսի 30-ին Հունաստանը պետք է մարի ԱՄՀ վարկի հերթական մասնաբաժինը:

Հունիսի 23-ին Բրյուսելում աշխատանքն ավարտեց հունական պարտքի վերաբերյալ գումարված արտահերթ Եվրագագաթնաժողովը, որի արդյունքները միանշանակ չեն Հունաստանի համար: Մի կողմից, երկիրը մնում է եվրոյի գոտում և դրամական միջոցներ է ստանում Եվրամիությունից, մյուս կողմից` ստիպված է փոխզիջման գնալ` պահպանելով սոցիալական լարվածությունը:

Եվրամիությունը Հունաստանին 35 մլրդ եվրո կտրամադրի մինչև 2020 թ.: Ինչպես հայտարարեց Եվրահաձնաժողովի նախագահ Ժան Կլոդ Յունկերը, միջոցները «հատկացվում են ոչ միայն բյուջեի կոնսոլիդացիայի համար, դրանք անհրաժեշտ են իրական տնտեսության համար»` աշխատատեղերի ստեղծման համար: Սակայն Եվրամիությունը չի պատրաստվում չեղյալ համարել Հունաստանի պարտքը, հայտարարեց Յունկերը: Նա ասաց, որ հիմա ժամանակը չէ քննարկելու պարտքի կրճատելու մասին Հունաստանի խնդրանքը:

Ավելի վաղ պարտատերերը պահանջում էին Հունաստանից կրճատել կենսաթոշակները, թոշակառուներին տրվող նպաստները և աշխատավարձերը: Հունաստանի իշխանությունները հակադարձում էին, որ 5 տարվա տնտեսման ռեժիմից հետո երկիրը հայտնվել է ծանր ֆինանսական և տնտեսական ճգնաժամում և նոր միջոցների բնակչությունն այլևս չի դիմանա:

Սակայն Հունաստանը ստիպված եղավ գնալ որոշ զիջումների` դրանցից մեկը ԱԱՀ ավելացումն է, և որոշ միջոցներ բիզնեսի համար:

2010 թ. ի վեր, երբ ճգնաժամ արձանագրվեց Հունաստանի պետպարտքի հարցում, ԵՄ-ն ու ԱՄՀ-ն այդ երկրին գրեթե 250 մլրդ եվրո հատկացրեցին, և Աթենքը աստիճանաբար պետք է վերադարձնի գումարը: Չնայած, որ 2012-ին պարտքը մասնակիորեն չեղյալ համարվեց, այդ երկրի պետպարտքը ներկա պահին գերազանցում է 315 մլրդ եվրոն, ինչը կազմում է ՀՆԱ 175 տոկոսը: Դա 3 անգամ գերազանցում է եվրոյի երկրների համար սահմանված պետպարտքի թույլատրելի շեմը, որն, ըստ Կայունության և աճի պակտի կազմում է ՀՆԱ 60 տոկոսը

Հղումներ թեմայով.

Ria.ru. Правительство Греции официально объявило о закрытии банков до 6 июля