// IP Marketing video - START// IP Marketing video - END

«Ոսկե ծիրանի» մրցանակակիրները հայտնի են. Լավագույնն է «Օձի գրկում» ֆիլմը

«Ոսկե ծիրանի» մրցանակակիրները հայտնի են. Լավագույնն է «Օձի գրկում» ֆիլմը

PanARMENIAN.Net - «Ոսկե ծիրան» 12-րդ միջազգային կինոփառատոնն ամփոփել է մրցութային ծրագրերի արդյունքները: Հուլիսի 18-ին ժյուրիի կազմը փառատոնի փակման արարողությանը հայտարարել է մրցանակակիրներին:

Խաղարկային ֆիլմերի գլխավոր՝ «Ոսկե ծիրան» մրցանակին արժանացել է կոլումբիացի Սիռո Գեռայի «Օձի գրկում»ֆիլմը: Նույն անվանակարգում «Արծաթե ծիրան»-ի է արժանացել Հարավային Կորեայից Կիմ Դե-Հուանի «Ձմռան վերջը» ֆիլմը: Փառատոնի պատվավոր հյուր, համաշխարհային կինոյի աստղ Նաստասյա Կինսկին հատուկ մրցանակ է հանձնել Խայրո Բուստամանտեին (Գվատեմալա / Ֆրանսիա)՝ «Իշկանուլ» խաղարկային ֆիլմի համար:

Վավերագրական ֆիլմերի անվանակարգում հաղթել է Սիմոնե Ռապիզարդա Կազանովայի (Կանադա / Իտալիա) «Իմաստի ստեղծումը» ժապավենը, երկրորդ մրցանակին արժանացել է Ժան-Գաբրիել Պերիոյի (Ֆրանսիա / Գերմանիա / Շվեյցարիա) «Գերմանական երիտասարդություն»-ը:

«Կորիզ» կարճամետրաժ ֆիլմերի մրցույթում լավագույնը Պատրիկ Ֆոլռաթի (Գերմանիա / Ավստրիա) «Ամեն ինչ լավ կլինի» կինոնկարն է: 2-րդ մրցանակը ստացել է Դավուդ Խայամի (Մեծ Բրիտանիա) «Չելլե» ֆիլմը: Այս անվանակարգում Ժյուրիի հատուկ մրցանակին է արժանացել Ֆարհադ Ղոլամիի (Իրան) «Ամեն ինչ՝ վաճառքի» կինոժապավենը:

«Հայկական համայնապատկեր» ծրագրում «Ոսկե ծիրան»-ի արժանացել է Արման Երիցյանի (Հայաստան/ Գերմանիա/ Նորվեգիա) լիամետրաժ խաղարկային «Մեկ, երկու, երեք»-ը: 2-րդ մրցանակը շնորհվել է կարճամետրաժ խաղարկային «Բժիշկը» ֆիլմին, որի հեղինակն Աննա Գորոյանն է Ռուսաստանից: Նույն անվանակարգում Հրանտ Մաթևոսյանի անվան հատուկ մրցանակը լավագույն սցենարի համար ստացել է Գագիկ Մադոյանի «Ճանապարհ»-ը:

Էկումենիկ ֆիլմերից հաղթող է ճանաչվել Արամ Շահբազյանի (Հայաստան/ Ֆրանսիա/ Ռուսաստան) «Մոսկվիչ, իմ սեր» ֆիլմը, որը ստացել է նաև FIPRESCI-ի մրցանակը:

Փառատոնն այս տարի ստացել է մոտ 1600 հայտ 105 երկրից, ինչը վկայում է աճող հետաքրքրության և ներկայացվող ֆիլմերի աշխարհագրության ընդլայնման մասին (2014-ին ստացվել էր 1500 հայտ մոտ 95 երկրից): 12-րդ «Ոսկե ծիրանի» առանցքում են եղել Հայոց ցեղասպանության մասին ֆիլմերի ցուցադրությունները: Փառատոնի շրջանակում իրականացվել է Հայոց ցեղասպանությանը նվիրված ծավալուն երկու ծրագիր` «Մենք կանք» և «Այլևս երբեք»:

 Ուշագրավ
Ավելի վաղ նա շախմատ խաղացող հայերի լուսանկար էր հրապարակել և նշել, որ նոր նախագիծ է նախապատրաստում
Այն կպայքարի մրցանակի համար «Լավագույն օտարալեզու ֆիլմ» անվանակարգում
«Ազնավուրը բացարձակ արտիստ է, նա երգեր է գրել նաև ֆիլմերի համար, նաև մեծ դերասան է, սցենարներ է գրել»,-ասել է «Սեզարի» նախագահ Ալեն Թերզյանը
Ցուցահանդեսը մեկտեղում է ժամանակակից կերպարվեստը, քանդակագործությունը, լուսանկարչությունը, տեսանյութեր