«ՀՀ օգտին լրտեսության համար» մեղադրվող ադրբեջանցի լրագրողն ազատ է արձակվել

PanARMENIAN.Net - Ադրբեջանում ազատ է արձակվել լրագրող Ռաուֆ Միրկադիրովը, ով պնդում է, թե նրա դեմ մեղադրանքներն անհիմն են:

«Իմ ձերբակալությունն Ադրբեջանի թշնամիների ձեռքի գործն է»,- հայտարարել է լրագրողն ազատ արձակվելուց հետո, BBC-ի ռուսական ծառայությանը հղումով գրում է Tert.am-ը:

2015-ի վերջին դատարանը դատապարտել է Միրկադիրովին վեց տարվա ազատազրկման՝ պետական դավաճանության համար: Լրագրողը մեղավոր է ճանաչվել «Հայաստանի օգտին լրտեսության համար»։

Վերաքննիչ դատարանը պատիժը փոխարինել է պայմանականի՝ հինգ տարվա փորձաշրջանով: Միրկադիրովը պնդում է, որ երբեք գործ չի ունեցել Հայաստանի կամ աշխարհի որևէ այլ երկրի հատուկ ծառայությունների հետ:

Լրագրողը պատրաստվում է հասնել դատավճռի ամբողջական չեղարկման:

Միրկադիրովը ձերբակալվել էր 2014-ի ապրիլին՝ պետական դավաճանության փորձի համար՝ Թուրքիայից արտաքսվելուց անմիջապես հետո։ Միրկադիրովի ձերբակալության իրական պատճառը, սակայն, իրավապաշտպան Լեյլա Յունուսի «Խաղաղության և ժողովրդավարության» նախագծերին մասնակցելն է։