Քերի. Վաշինգտոնն ու Մոսկվան կարող են վերադառնալ նորմալ երկխոսության

PanARMENIAN.Net - ԱՄՆ-ն ցանկանում է վերադառնալ նորմալ երկխոսության Ռուսաստանի հետ և առաջընթաց այդ ուղղությամբ կա: Այդպիսի կարծիք է հայտնել ԱՄՆ պետքարտուղար Ջոն Քերին, հայտնում է BBC-ին ՏԱՍՍ-ի վրա հղումով:

Քերին ժամանել է Մոսկվա մարտի 23-ին, 24-ին տեղի է ունեցել նրա հանդիպումը ՌԴ նախագահ Պուտինի և ԱԳ նախարար Սերգեյ Լավրովի հետ:

Ըստ Քերիի, օրակարգի գլխավոր թեմաներն են եղել Սիրիայի և Ուկրաինայի հակամարտությունները, հակազդեցությունը ծայրահեղականությանը, ինչպես նաև ԱՄՆ և ՌԴ ջանքերի միավորումը այդ խնդիրների հաջող լուծման համար: «Ռուս ժողովրդի համար շատ ավելի լավ կլինի, եթե մենք կարողանանք խաղաղության հասնել Ուկրաինայում և Սիրիայում: Դա որոշ չափով կթարմացնի ԱՄՆ և ՌԴ հարաբերությունները, որպեսզի մենք կարողանանք միասին աշխատել ցանկացած մարտահրավերի դեպքում»,-ասել է Քերին:

Ըստ նրա, ԱՄՆ և ՌԴ կողմից ընդհանուր ըմբռնումը Սիրիայի հարցով թույլ կտա խուսափել նոր ահաբեկչական գործողություններից:

Մարտի 22-ին մի շարք պայթյուններ են որոտացել Բրյուսելի օդանավակայանում և մետրոյում, զոհվել է 31 մարդ, ևս 186-ը վիրավորվել է: 14 մարդ զոհվել և 80-ը վիրավորվել է Բրյուսելի օդանավակայանում, ևս 20 զոհ ու 106 վիրավոր կա քաղաքի մետրոյում պայթյունի հետևանքով:«Իսլամական պետությունը» ստանձնել է ահաբեկչության պատասխանատվությունը: Ինչպես հայտնել է AP աղբյուրը իրաքյան հետախուզությունում, ԻՊ ահաբեկիչները սիրիական Ռաքքայում 2 ամիս ահաբեկչություններ են ծրագրել Եվրոպայի օդանավակայաններում և երկաթուղային կայարաններում:

Քերին հերթական անգամ կոչ է արել ՌԴ իշխանություններին ճնշում գործադրել Դոնբասի ինքնահռչակ հանրապետությունների կողմնակիցների վրա, որպեսզի նրանք կատարեն Մինսկի պայմանավորվածությունները: Ըստ նրա, «կա գործողությունների ցանկ, որոնք անջատողականները պետք է անեն, կարծում ենք, որ Ռուսաստանը կարող է ազդել դրանց կատարման վրա»: Մարտի 24-ին Քերին մեկնել է Բրյուսել` բանակցելու Եվրահանձնաժողովի ղեկավարության հետ հակաահաբեկչության և ՌԴ այցի արդյունքների մասին: