ՀԱԿ-ը չի մասնակցի ԱԺ-ում ԸՕ քննարկումներին. Սպասելու են կոնսենսուսի

PanARMENIAN.Net - Ընդդիմադիր Հայ ազգային կոնգրես խմբակցությունը առկախում է իր մասնակցությունը նոր Ընտրական օրենսգրքի քննարկումներին, քանի դեռ կոնսենսուս ձեռք չի բերվել:

Այս մասին հայտարարել է խմբակցության ղեկավար Լևոն Զուրաբյանը օրենսգրքի նախագծի՝ ապրիլի 25-ին Ազգային ժողովում քննարկումներից առաջ, հաղորդում է «Ազատություն» ռադիոկայանը:

Մարտի 3-ին ՀՀ կառավարությունը հավանություն է տվել «ՀՀ ընտրական օրենսգրքին» և մի շարք այլ օրենքներում փոփոխություններ և լրացումներ կատարելու մասին ՀՀ օրենքների նախագծերի փաթեթին: Ընտրական նոր օրենսգրքի հենքը Սահմանադրական փոփոխություններն են: Նախագահ Սերժ Սարգսյանի հրամանագրով սահմանված ժամկետներին համապատասխան՝ ընտրական օրենսգրքի նախագիծը ԱԺ պետք է ներկայացվեր մարտի 1-ին, սակայն դա չի արվել: Իսկ Կառավարության որոշումից առաջ այն չի ներկայացվել հանրային քննարկմանը:

Մարտի 31-ին Հայաստանի իշխանության, ընդդիմության և քաղաքացիական հասարակության ներկայացուցիչները չորեքշաբթի անցկացրել են իրենց առաջին հանդիպումը այսպես կոչված 4 + 4 + 4 ձևաչափով, ինչը նախատեսում է հավասարության սկզբունքով նրանց ներառում նոր Ընտրական օրենսգրքի նախագծի շուրջ քննարկումներում:

Կարդացեք նաև՝ Ընտրական օրենսգրքի քննարկման արդյունքները. Գունավոր քվեաթերթիկներից մինչև ընտրացուցակների հրապարակում