ԱՄՆ պաշտոնյա. Նավթից ԻՊ-ի եկամուտը կրկնակի կրճատվել է՝ հասնելով $250 մլն-ի

12 մայիսի 2016 - 13:05 AMT

PanARMENIAN.Net - «Իսլամական պետություն» ահաբեկչական խմբավորման՝ նավթի արդյունահանումից ու վաճառքից ստացվող եկամուտները կրճատվել են՝ տարեկան $500 մլն-ից հասնելով $250 մլն-ի: Այդ մասին հայտարարել է ԱՄՆ ֆինանսների նախարարի օգնական Դենիել Գլասերը:

«Հավանաբար նրանք այժմ ստանում են նախկինում ունեցածի կեսը»,- հաղորդել է նա՝ նշելով, որ դրան հաջողվել է հասնել ավիահարվածների, ինչպես նաև նավթի մաքսանենգության դեմ պայքարի արդյունքում, ՏԱՍՍ-ին հղումով գրում է Tert.am-ը:

Բացի այդ, Գլասերը նշել է, որ խմբավորումը տարեկան 360 մլն դոլար եկամուտ է ստանում իր վերահսկողության տակ գտնվող տարածքներից հարկեր հավաքելով:

2016-ի ապրիլին Reuters գործակալությունը էներգետիկայի ոլորտում IHS Global Inc խորհրդատվական ընկերության զեկույցի վրա հղումով հայտնել է, որ Ահաբեկչական «Իսլամական պետություն» խմբավորման եկամուտները 2015-ի կեսից սկսած նվազել են 30%-ով: Ըստ փաստաթղթի, 2015-ին կազմակերպության եկամուտները հասնում էին $80 միլիոնի, մինչդեռ 2016-ին` $56 մլն: Բացի այդ, մեկ երրորդով կրճատվել է նավթի արդյունահանումը ԻՊ վերահսկվող տարածքներում` օրական 33 հազարից մինչև 21 հազար բարել:

2015-ի դեկտեմբերին ՌԴ ՊՆ-ն հրապարակել է ԻՊ վերահսկվող տարածքներից դեպի Թուրքիայի նավթի արտահանման ապացույցները, որի գլխավոր շահառուներ հայտարարվեցին Թուրքիայի նախագահն ու նրա ընտանիքի անդամները: Ռուսաստանի ՆԳՆ-ն հրապարակել է լուսանկարներ ու տեսանյութեր, որոնցում արձանագրված է թուրքական նավահանգիստներում բենզատար մեքենաների կուտակում, որոնք ժամանել են իսլամիստներին ենթակա տարածքներից:

Հղումներ թեմայով.

Նավթից ստացվող ԻՊ-ի եկամուտը կրճատվել է՝ տարեկան հասնելով 250 մլն դոլարի. ամերիկացի պաշտոնյա. Tert.am

Reuters. Islamic State yearly oil revenue halved to $250 million: U.S. official

Tass.ru: Минфин США: доход ИГ от нефти сократился до $250 млн в год