Կուբան 50 տարում առաջին անգամ ապրանք կարտահանի ԱՄՆ

6 հունվարի 2017 - 21:00 AMT

PanARMENIAN.Net - Կուբայի իշխանությունները հայտարարել են, որ գործարք են կնքել, որի շրջանակում վերջին 50 տարում առաջին անգամ այդ երկրից ԱՄՆ օրինական ճանապարհով բեռներ կարտահանվեն: Խոսքը 40 տոննա ածուխի մասին է, որի արժեքն ըստ պայմանագրի մոտ 17.000 դոլարի է հասնում, գրում է ՌԻԱ Նովոստին Reuters-ի վրա հղումով:

«Սա առաջին պայմանագիրն է, բայց մենք հուսով ենք, որ հարաբերությունները կշարունակվեն և ոչ միայն ածուխի արտահանման մասով, այլ նաև այլ արտադրանքի, օրինակ, մենք կարող ենք մեղր կամ սուրճ արտահանել»,-հայտարարել է Իզաբելլա Օ՛Ռայլին՝ Cubaexport պետական ընկերության տնօրենը:

2014-ի ավարտին ԱՄՆ-ն և Կուբան հայտարարեցին հարաբերությունների աստիճանական վերականգնման մասին: Մինչ օրս հաստատվել են դիվանագիտական հարաբերություններ, Հավանա այցելեց ԱՄՆ նախագահ Բարաք Օբաման: ԱՄՆ-ն մեղմացրել է Կուբայի դեմ գործող որոշ պատժամիջոցները, թեև կես դարից ավելի գործող առևտրի էմբարգոն դեռ ուժի մեջ է:

Հղումներ թեմայով.

Reuters. Charcoal becomes first Cuban export to United States in half a century

Ria.ru: Куба заключила первый за 50 лет экспортный контракт с компанией в США