Իսպանական ընկերությունը ՀՀ արևային էներգետիկայում մինչև 200 մլն եվրո է ուզում ներդնել

25 հունվարի 2017 - 14:10 AMT

PanARMENIAN.Net - Իսպանական «Ակցիոնա Էներգիա» ընկերության ներկայացուցիչ Միգել Արարասը, ով «Էներգետիկայի շաբաթ 2017» համաժողովի շրջանակում ժամանել է Հայաստան, լրագրողների հետ զրույցում հայտարարել է, որ ընկերությունը նպատակ ունի մասնակցել Գեղարքունիքի մարզի Մասրիկ 1 տեղանքում առաջին արևային կայանի կառուցման մրցույթին, հայտնում է Aysor.am-ը:

«Մենք արդեն մեկ տարի է՝ աշխատում ենք Հայաստանում: Գիտենք, որ այն վստահելի երկիր է և որոշում է ընդունել վերականագնվող էներգետիկային անցնել: Սա մաքուր և ապահով էներգիա է, իսկ հիմա նաև մրցունակ է դարձել սակագների տեսանկյունից», - ընդգծել է նա:

Միգել Արարասը նշեց, որ ընկերությունը նպատակ ունի երկարաժամկետ ներդրումներ կատարել և կայանների հզորությունը հասցնել մինչև 150 ՄՎտ, որի համար պատրաստ է մեծ գումարներ ներդնել:

«Մենք երկարաժամկետ ներդրող ենք և նախատեսում ենք համագործակցել առնվազն 25 տարով: Եթե 150 ՄՎտ իրականություն դառնա, ապա մենք պատարստ ենք ներդնել մոտ 200 մլն եվրո: Բայց դրա համար երկիրը պետք է վստահություն ներշնի և կայուն պայմաններ ապահովի: Քանի որ մենք մասնավոր ընկերություն ենք, պետք է վստահ լինենք, որ կառավարությունը կերաշխավորի պայմաններ, որոնց առկայութամբ մենք մեր գումարները կստանանք», - հավելել է նա:

Հունվարի 25-ին Երևանում մեկնարկել է «Էներգետիկայի շաբաթ 2017» 3-օրյա համաժողովը, որին մասնակցում են մի շարք օտարեկրյա ներդրողներ: Նրանց են ներկայացվել Գեղարքունիքի մարզի Մասրիկ-1 տեղանքում առաջին արևային կայանի կառուցման հնարավորությունները: Կայանի նախատեսվող հզորությունը 55 ՄՎտ է:

Նախատեսվում է անցկացնել մրցույթ, որը հնարավորություն կտա նվազագույն սակագնի առաջարկ ստանալ փորձառու կազմակերպությունների մասնակցությամբ:

Միջոցառմանը ներկա ՀՀ նախագահ Սերժ Սարգսյանն իր խոսքում կարևորել է էներգետիկայի բնագավառը՝ որակելով այն որպես ՀՀ տնտեսության կարևոր ճյուղ` նշելով, որ ՀՀ-ն ունի հատկապես արևային էներգետիկայի զարգացման մեծ ներուժ, որը պետք է գրավիչ դարձնել ներդրողների համար։

2016-ի ավարտին կառավարությունը հավանություն տվեց արևային ֆոտովոլտային կայանների կառուցման ներդրումային ծրագրին, որի ներդրումային ընդհանուր գինը գնահատվում է մոտ 129 մլն դոլար։ Ծրագրի շրջանակում նախատեսվում է Հայաստանի տարբեր բնակավայրերում կառուցել մինչև 110 մեգավատ հզորությամբ արդյունաբերական մասշտաբի կայաններ։

Հղումներ թեմայով.

Aysor.am.Իսպանական ընկերությունը պատրաստ է 200 մլն եվրո ներդնել Հայաստանում արևային կայան կառուցելու համար