ԵԱՀԿ ՄԽ. ԼՂ գծով պայմանավորվածությունները պետք է կատարվեն

PanARMENIAN.Net - ԵԱՀԿ Մինսկի խմբի համանախագահ երկրները վստահ են, որ ղարաբաղյան հակամարտությունը ռազմական լուծում չունի և անրաժեշտ է վերադառնալ բանակցությունների սեղանի մոտ ամենաբարձր մակարդակով: Այդ մասին հայտարարել է ԵԱՀԿ ՄԽ ամերիկացի համանախագահ Ռիչարդ Հոգլանդը մամուլի ասուլիսում:

«Բոլոր համանախագահ երկրները վստահ են, որ հակամարտությունը չունի ռազմական լուծում», -ասել է Հոգլանդը, հայտնում է ՏԱՍՍ-ը:

Ըստ նրա, «անհրաժեշտ է վերադառնալ բանակցություններին ամենաբարձր մակարդակով»:

Իր հերթին ֆրանսիացի համանախագահ Ստեֆան Վիսկոնտին լրագրողների հետ զրույցում հայտարարել է, որ ԱՄՆ-ն, ՌԴ-ն և Ֆրանսիան կշարունակեն համատեղ ջանքերն, ուղղված ղարաբաղյան հակամարտության կարգավորմանը:

«Անշուշտ, դա բարդ հարց է՝ ինչպես գիտեք, շփման գծում լարվածություն կա, սակայն գործընթացն առաջ է շարժվում մեռյալ կետից, կողմերը ցանկանում են առաջընթացի հասնել: Կարծում եմ, դա շատ կարևոր է»,-ասել է դիվանագետը:

Նա հայտնել է, ոև Ադրբեջանի նախագահ Իլհամ Ալիևը մարտի 14-ին Փարիզում հանդիպում կունենա Ֆրանսիայի նախագահ Ֆրանսուա Օլանդի հետ:

ՌԴ համանանախագ Իգոր Պոպովը կոչ է արել կողմերին կատարել 2016-ի մայիսին և հունիսին Վիեննայում և Սանկտ Պետերբուրգում ձեռք բերված պայմանավորվածությունները:

Հունիսի 20-ին Սանկտ Պետերբուրգում տեղի է ունեցել ՀՀ, ՌԴ և ԱՀ նախագահներ Սերժ Սարգսյանի, Վլադիմիր Պուտինի ու Իլհամ Ալիևի եռակողմ հանդիպումը: Դրա արդյունքներով կողմերն ընդունել են հայտարարություն, որում, մասնավորապես, նշվում է. «ՀՀ և ԱՀ նախագահները հաստատեցին ղարաբաղյան հակամարտության գոտում իրավիճակի կայունացմանն ուղղված մայիսի 16-ին Վիենայում տեղի ունեցած վեհաժողովի պայմանավորվածությունների կատարումը: Այդ նպատակով, նրանք, մասնավորապես, պայմանավորվել են ավելացնել միջազգային դիտորդների քանակը հակամարտության գոտում: Նրանք գոհունակություն արտահայտեցին շփման գծում վերջին ժամանակաշրջանում հրադադարի ռեժիմի պահպանման կապակցությամբ»:

Մայիսի 16-ին Վիեննայի գագաթաժողով պայմանավորվածություններ են ձեռք բերվել՝ հիմնախնդրի խաղաղ կարգավորման հանձնառությունը, 1994-1995թթ. զինադադարի վերաբերյալ համաձայնագրերի անշեղ իրականացումը, հակամարտության գոտում առավել արդյունավետ մոնիտորինգի իրականացման և հետաքննության մեխանիզմի ձևավորման նպատակով ձեռնարկվելիք քայլերը, որոնք անհրաժեշտ պայմաններ կստեղծեն բանակցային գործընթացը վերսկսելու համար: