Մանչեսթերի ահաբեկչության զոհերի թվում 8-ամյա աղջիկ կա

PanARMENIAN.Net - Մայիսի 22-ին Մանչեսթերի «Մանչեսթեր Արենա» մարզադաշտում տեղի ունեցած ահաբեկչության զոհերի թվում 8-ամյա աղջիկ կա:

Մայիսի 22-ին Մեծ Բրիտանիայի Մանչեսթեր քաղաքի «Մանչեսթեր Արենա» (Manchester Arena) մարզադաշտում ամերիկացի երգչուհի Արիանա Գրանդեի համերգից անմիջապես հետո 2 պայթյուն է որոտացել, ինչի հետևանքով զոհվել է նվազագույնը 22 մարդ, վիրավորվել՝ մոտ 60-ը:

Ողբերգության ժամանակ փոքրիկ Սեֆֆի-Ռոուզ Ռուսոսը անջատվել է մորից ու քրոջից, որոնց հետ եկել էր համերգի: Սոցցանցերում աղջկա բարեկամներն ու ընկերները մինչև վերջին պահը հույսը չէին կորցնում և փորձում էին ինչ-որ բան իմանալ կորած աղջկա մասին, գրում է The Telegraph-ը:

Սակայն,հաստատվեց նրա մահվան լուրը՝ աղջիկը մահացել է պայթյունի հետևանքով ստացած վնասվածքներից:

Զոհված աղջնակի մայրը՝ Լիզան, և նրա ավագ քույրը՝ Էշլին, հիվանդանոցում են բեկորային վնասվածքներով, որոնք, սակայն, վտանգ չեն ներկայացնում կյանքի համար:

Մանչեսթերի ոստիկանությունը հաստատել է, որ 23-ամյա երիտասարդ է ձերբակալվել Մանչեսթերում մայիսի 22-ին տեղի ունեցած ահաբեկչությանը մեղսակից լինելու կասկածանքով: «Ինչ վերաբերում է «Մանչեսթեր Արենայի» միջադեպին, մենք կարող ենք հաստատել, որ մեզ հաջողվել է ձերբակալել 23-ամյա մի երիտասարդի Մանչեսթերի հարավում»,-ասվում է հաղորդագրության մեջ:

Ընթերցեք նաև՝ Պայթյուն վերջին ակորդի ժամանակ. Ինչն է հայտնի մանչեսթերյան ահաբեկչության մասին, ինչը՝ դեռ ոչ