Շավարշ Քոչարյանը՝ Սվիտալսկու քննադատության մասին. Աղմուկը մի քիչ շատ է եղել

PanARMENIAN.Net - ՀՀ փոխարտգործնախարար Շավարշ Քոչարյանը, մեկնաբամելով ՀՀ-ում ԵՄ դեսպան Պյոտր Սվիտալսկու` Հայաստանի ընտրական գործընթացներին վերաբերվող վերջերս արած հայտարարությունները, ասել է, որ գործընկերների ցանկացած առաջարկություն, քննարկման ենթակա է, գրում է Aravot.am-ը:

«Մեր բոլոր համակարգերը կարիք ունեն բարեփոխումների, այդ թվում նաեւ ընտրական: Մի քիչ շատ է եղել աղմուկն այդ ամենի շուրջ, բայց մեր գործընկերների ցանկացած առաջարկություն, քննարկման ենթակա է, մանավանդ եթե դրանք բխում են մեր շահերից», - խորհրդարանում շարունակվող 2016 թվականի բյուջեի կատարողականի քննարկումների ժամանակ ասել է Քոչարյանը՝ պատասխանելով ԵԼՔ խմբակցության պատգամավոր Մանե Թանդիլյանի հարցին:

Հայաստանում ԵՄ պատվիրակության ղեկավար Պյոտր Սվիտալսկին հունիսի 15-ին «Ընտրական զարգացումները Հայաստանում. Քաղված դասերը և հետագա քայլերը» թեմայով համաժողովում հայտարարեց, որ տեղի ունեցած վերջին խորհրդարանական ընտրությունները «կատարյալ» չեն եղել: Իշխանությանն այս հայտարարությունը, մեղմ ասած, դուր չեկավ:

«Լրատվամիջոցներում հրապարակումներ եղան այն մասին, թե բարոյական ինչպիսի ճգնաժամ կա դպրոցներում՝ փող բաժանելու դեպքեր, մարդիկ ծեծի են ենթարկվել, ընդհանրապես` խայտառակ դեպքեր։ Մասնավոր հիմնարկների աշխատողները բռի, անկիրթ վերաբերմունքի են արժանացել` ձայն բերելու համար: Բուժհասըտատություններից մեկում հիվանդների փոխարեն քվեարկել են բժիշկները: Սրանք անընդունելի երևույթներ են, որոնք պետք է վերացվեն», - ասել էր Սվիտալսկին:

Կարդացեք նաև՝ Սվիտալսկի VS ՀՀ իշխանություններ. Ընտրությունների մասին բանավեճը՝ մեջբերումներով