Հայ մարմնամարզիկները Փարիզից մեդալ չեն բերել

PanARMENIAN.Net - Սպորտային մարմնամարզության Հայաստանի հավաքականի անդամներ Արթուր Դավթյանը, Վահագն Դավթյանը եւ Հարություն Մերդինյանը հանդես են եկել Փարիզում կայացած աշխարհի գավաթի խաղարկության փուլում:

Ազգային հավաքականի գլխավոր մարզիչ Հակոբ Սերոբյանի ղեկավարությամբ մեր մարմնամարզիկները մի քանի գործիքներում անցել են եզրափակիչ փուլ, բայց չեն կարողացել զբաղեցնել մրցանակային տեղեր:

Հենացատկեր վարժությունում Արթուր Դավթյանը զբաղեցրել է 6-րդ տեղը (3-րդը՝ որակավորման փուլում), օղակներում՝ 8-րդ (8): Հավաքականի առաջատարը որակավորման փուլի նժույգ թափեր վարժությունում զբաղեցրել է 9-րդ տեղը, զուգափայտերում՝ 11-րդ՝ չկարողանալով անցնել եզրափակիչ, հայտնում է ՀԱՕԿ-ի լրատվական ծառայությունը:

Վահագն Դավթյանը որակավորման փուլի օղակներ վարժությունում զբաղեցրել է 5-րդ հորիզոնականը, բայց եզրափակչում նահանջել մեկ տեղով:

Հարություն Մերդինյանը նժույգ թափերում թույլ տված սխալի պատճառով որակավորման փուլում 21-րդն էր: Հայ մարզիկները հանդես չեկան ազատ վարժություններում և պտտաձողում:

Այժմ Հայաստանի հավաքականն ուսումնամարզական հավաք կանցկացնի Փարիզում, իսկ սեպտեմբերի 27-ին Ֆրանսիայի մայրաքաղաքից կմեկնի Մոնրեալ՝ մասնակցելու աշխարհի առաջնությանը (հոկտեմբերի 2-ից 8-ը):