The Guardian. iQOS-ներն այնքան անվտանգ չեն, ինչպես ասում է արտադրողը

4 հուլիսի 2018 - 18:01 AMT

PanARMENIAN.Net - «Ֆիլիպ Մորիս» ընկերության iQOS գոլորշի գեներացնող էլեկտրոնային սարքերն այնքան անվտանգ չեն, ինչպես հայտարարում է արտադրողը: Այդ մասին ասվում է Tobacco Control պարբերականում հրապարակված հետազոտության մեջ:

Նշվում է, որ ծխողները ստիպված են լինում ավելի հաճախ ներքաշումներ անել ավելի շատ նիկոտին կլանելու համար, քանի որ սիգարի գլանակը տաք է մնում միայն 6 րոպե, որից հետո սարքն անջատվում է և անհրաժեշտ է լինում այն կրկին լիցքավորել: Դա նշանակում է, որ iQOS ծխողը մեծ քանակի գոլորշի է կլանում, գրում է The Guardian-ը:

«Ֆիլիպ Մորիս» ընկերությունը հրապարակել է սեփական փորձերի արդյունքները սարքի ազդեցության մասին, սակայն, ինչպես պնդում են Կալիֆորնիայի համալսարանի մասնագետները, դրանք հրապարկվել են մի ամսագրում, որը, հնարավոր է, լիովին չի վերլուծել բոլոր տարրերը:

Թեև էլեկտրոնային ծխախոտը ծուխ չի արտադրում, հայտնաբերվել է, որ ծխարկիչը մասնակիորեն այրվում է պիրոլիզի արդյունքում: Եթե սարքը լիովին չի մաքրվում յուրաքանչյուր ծխելուց հետո, այրումն ավելի ուժեղ է լինում, ուստի մնացորդների և հեղուկի կուտակումն ավելացնում է պիրոլիզի ջերմաստիճանը:

«iQOS-ն այն արտադրանքը չէ, որը լիովին առանց ծուխ արտադրելու է գործում: Հետազոտությունը վկայում է, որ սարքն այնքան անվտանգ չէ, որքան ներկայացվում էր, միևնույն ժամանակ նշելով, որ հարկավոր է փորձարկել արտադրանքի անվտանգությունը, քանի որ սպառումն աճում է»,- ասվում է հետազոտության մեջ:

Սարքը պլաստիկ պոլիմերային թաղանթ ունի գոլորշու սառեցման համար: Ըստ հետազոտության, թաղանթը հալվում է ջերմացման արդյունքում: Էլեկտրոնային iQOS-ներ են վաճառվում նաև Հայաստանում:

Հղումներ թեմայով.

The Guardian. Smokeless cigarettes not as harmless as claimed, study says