Քոչարյանին կալանավորած դատավոր. ԱԱԾ տնօրենին չեմ ճանաչում, նրան երբեք չեմ զանգել

PanARMENIAN.Net - Մարտի 1-ի գործով մեղադրյալ ՀՀ երկրորդ նախագահ Ռոբերտ Քոչարյանին կալանավորելու ՀՔԾ-ի միջնորդությունը բավարարած՝ Երևան քաղաքի առաջին ատյանի ընդհանուր իրավասության դատարանի դատավոր Վաչե Մարգարյանը հայտարարություն է տարածել ՀՀ ԱԱԾ տնօրեն Արթուր Վանեցյանի և ՀՔԾ պետ Սասուն Խաչատրյանի գաղտնալսված հեռախոսազրույցի առնչությամբ, որտեղ նշել է, որ ԱԱԾ տնօրենին անձամբ չի ճանաչում, նրան երբեք չի զանգահարել, հայտնում է, ՀՀ դատական դեպարտամենտի մամուլի և հասարակայնության հետ կապերի ծառայությունը:

«2018 թվականի սեպտեմբերի 11-ին համացանցում տարածված գաղտնալսման մեջ ինձ է վերագրվում ՀՀ Ազգային անվտանգության ծառայության տնօրենի հետ հեռախոսային խոսակցու­թյունը՝ իմ կողմից խափանման միջոց ընտրելու հետ կապված միջնորդության քննության առնչությամբ: Ամենայն պատասխանատվությամբ հայտարարում եմ, որ ես ՀՀ ԱԱԾ տնօրենին անձամբ չեմ ճանաչում, նրան չեմ զանգահարել և նրա հետ երբևիցե որևէ հեռախոսային խոսակցություն չեմ ունեցել», - նշված է հայտարարության մեջ:

Ավելի վաղ, համացանցում տարածվել է ՀՀ ԱԱԾ տնօրեն Արթուր Վանեցյանի և ՀՔԾ պետ Սասուն Խաչատրյանի՝ Մարտի 1-ի գործի վերաբերյալ գաղտնալսված հեռախոսային ձայնագրությունը, որտեղ Վանեցյանն ասում էր, որ իրեն է զանգելդատավորը:

«Դե մի քիչ վախեցած է, ասացի՝ մի հատ նայի ամբողջ գործը, Հրաչ, հա՞, Հրաչ է անո՞ւնը... Մի խոսքով՝ դատավորը, ով որ պետք է կալանքը տա, ասել եմ՝ դուխով: Ասաց՝ մի հատ գործը նայեմ, պարոն Վանեցյան, զանգեմ զեկուցեմ: Ասացի՝ նայիր հիմքերը, բայց կալանքը ուզես-չուզես պետք է տաս», - մասնավորապես ասել էր նա հեռախոսազրույցում: