ՌԴ Օրյոլ քաղաքի դատարանը գաղութում 6 տարվա ազատազրկման է դատապարտել Դանիայի քաղաքացի և «Եհովայի վկաների» հետևորդ Դեննիս Կրիստենսենին արգելված կրոնական միավորման գործունեության կազմակերպման համար: Սա առաջին նման խիստ դատավճիռն է այդ կազմակերպության հետևորդների պարագայում:
Ըստ քննության վարկածի, Կրիստենսենը ղեկավարել է «Եհովայի վկաների» համայնքը Օրյոլում, տնօրինել է գույքը, կազմակերպել է դրամահավաքներ և գրականություն է տարածել հետևորդներ գրավելու համար:
Կրիստենսենի փաստաբան Անտոն Բոգդանովն ասել է, որ մտադիր է բողոքարկել դատավճիռը, գրում է «Վեդոմոստին:
«Եհովայի վկաները» 19-րդ դարի վերջում Միացյալ Նահանգներում ստեղծված միջազգային կրոնական կազմակերպություն է: Կազմակերպության հաղորդած պաշտոնական տվյալների համաձայն՝ նրանց անդամների թիվը ողջ աշխարհում 8.58 մլն է: Կազմակերպության գործունեությունը վերահսկվում է 8 անձից կազմված խմբի՝ «կառավարիչ մարմնի» կողմից: