Սեպտեմբերի 26-ին կմեկնարկի «Կոմիտաս» միջազգային գիտաժողով-փառատոնը

Սեպտեմբերի 26-ին կմեկնարկի «Կոմիտաս» միջազգային գիտաժողով-փառատոնը

PanARMENIAN.Net - Սեպտեմբերի 26-ին՝ Կոմիտասի ծննդյան օրը, մեկնարկում է Վարդապետի 150-ամյակին նվիրված միջազգային գիտաժողով-փառատոնը, որը կազմակերպում են ՀՀ կրթության, գիտության, մշակույթի և սպորտի նախարարությունը, Կոմիտասի թանգարան-ինստիտուտը և Գերմանիայում ՀՀ դեսպանությունը:

Կոմիտասի թանգարան-ինստիտուտում տեղի է ունեցել «Կոմիտաս» միջազգային գիտաժողով-փառատոնին նվիրված մամուլի ասուլիս, որին մասնակցել են ՀՀ ԿԳՄՍ նախարար Արայիկ Հարությունյանը, Կոմիտասի թանգարան-ինստիտուտի տնօրեն Նիկոլայ Կոստանդյանը, գիտաժողով-փառատոնի գեղարվեստական ղեկավար Մհեր Նավոյանը և Հայաստանի ազգային ակադեմիական երգչախմբի գեղարվեստական ղեկավար, գլխավոր դիրիժոր Հովհաննես Չեքիջյանը:

Նախարարը ներկաներին տեղեկացրել է, որ այս ամիսների ընթացքում Կոմիտասի ծննդյան 150-ամյակը նշող հոբելյանական հանձնաժողովը և տարբեր կազմակերպություններ հսկայական աշխատանք են իրականացրել, սակայն հիմնական միջոցառումները կլինեն առաջիկա շաբաթներին: Միջոցառումները կմեկնարկեն սեպտեմբերի 26-ին, Կոմիտասի թանգարան-ինստիտուտում. պանթեոնում կմատուցվի հոգեհանգստի կարգ, ապա կներկայացվի Կենտրոնական բանկի թողարկած Վարդապետի 150 ամյակին նվիրված արծաթե հուշադրամ, իսկ երեկոյան կլինի մեծ համերգ:

Իսկ սեպտեմբերի 28-ին Գյումրիի Սև բերդ ամրոցում տեղի կունենա մեծ գալա համերգ, որի ընթացքում կներկայացվեն մի շարք հետաքրքիր լուծումներ:

«Փառատոնը բավականին մեծ մասշտաբ ունի. այն չի սահմանափակվում միայն Հայաստանով, միջոցառումներ կանցկանցվեն նաև երկրի սահմաններից դուրս: Ինչպես Թումանյանի, այնպես էլ Կոմիտասի 150 ամյակների հոբելյանական միջոցառումներն անցնում են ՅՈՒՆԵՍԿՕ-ի բարձր հովանու ներքո: Հոկտեմբերի 18-ին Փարիզում ՅՈՒՆԵՍԿՕ-ի կենտրոնակայանում տեղի կունենա 2 ցուցադրություն՝ մեկը նվիրված Թումանյանին, մյուսը՝ Կոմիտասին: Սա մեծ պատիվ է մեզ համար, որ ՅՈՒՆԵՍԿՕ-ն գնացել է ընդառաջ և նախաձեռնել է մեր երկու մեծերին նվիրված հոբելյանական միջոցառումների անցկացում կազմակերպության կենտրոնակայանում»,-նշել է նախարարը՝ միջոցառումների անցկացման գործում կարևորելով նաև ԱԳՆ-ի դերակատարությունը, ինչպես նաև ՀՀ դեսպանների ջանքերը՝ երկրի սահմաններից դուրս տոնական միջոցառումները բարձր մակարդակով կազմակերպելու համար: Արայիկ Հարությունյանն ընդգծել է, որ ԿԳՄՍ նախարարությունը Կոմիտասի 150 ամյակին նվիրված տոնական միջոցառումներն օգտագործում է նրա գործունեության հանրահռչակման համար:

«Փորձել ենք աշխարհին հավուր պատշաճի ներկայացնել Կոմիտասին և նրա միջոցով մեր բազմադարյա մշակութային ժառանգությունը, մեր երկիրը, մեր ազգային ինքնությունը»,-նշել է Կոմիտասի թանգարան-ինստիտուտի տնօրեն Նիկոլայ Կոստանդյանը:

Գիտաժողով-փառատոնի գեղարվեստական ղեկավար Մհեր Նավոյանի խոսքերով, այս հոբելյանը միայն ազգային իրողություն չէ, այլ միջազգային երևույթ և այն կարևոր հարթակներից մեկն է, որտեղ հայ ժողովուրդը ներդաշնակ ու համաքայլ է աշխարհին:

«Երբ աշխարհին ներկայանում ենք Կոմիտասով, մենք միշտ շահում ենք: Նա թողել է այնպիսի ժառանգություն, որ զարմացրել է Եվրոպային: Վաղը մեր բոլորիս պարծանքի ծննդյան օրն է, և մենք պարտավոր ենք մեր երախտիքը հայտնել Կոմիտասին, քանի որ նա մեր ազգի պատիվը բարձրացրել է մի նոր աստիճանի»,- նշել է Հովհաննես Չեքիջյանը:

Փառատոնի բացումը տեղի կունենա Ալ. Սպենդիարյանի անվան օպերայի և բալետի ազգային ակադեմիական թատրոնում սեպտեմբերի 26-ին, որի ընթացքում ելույթ կունենան Հայաստանի ազգային ակադեմիական երգչախումբը, Կարինե Բաբաջանյանը (սոպրանո, Գերմանիա), «ԳԵՂԱՐԴ» երգեցիկ խումբը, Շտեֆան Ֆինկեն (տենոր, Գերմանիա), Երևանի պետական կամերային երգչախումբը, Լուկա Բրունոն (բարիտոն, Իտալիա), «ՀՈՎԵՐ» պետական կամերային երգչախումբը, Տակահիրո Ակիբան (դաշնամուր, Ճապոնիա) և Հայաստանի պետական կամերային երգչախումբը:

Կոմիտասի 150 ամյակին նվիրված փառատոնի մի քանի համերգներ տեղի կունենան նաև Արցախում՝ Ստեփանակերտում, Շուշիում և Գանձասարում:

Այս տարի գիտաժողով-փառատոնի շրջանակներում նախատեսվում են միջոցառումներ նաև Գերմանիայում, մասնավորապես, հոկտեմբերի 8-ին Բեռլինի Հումբոլդտի համալսարանում կմեկնարկի «Կոմիտասը և իր ժառանգությունը» խորագրով միջազգային գիտաժողովը, որին կմասնակցեն երաժշտագետներ Հայաստանից, Գերմանիայից, Ֆրանսիայից, Ուկրաինայից, Իտալիայից և Ռուսաստանից: Հոկտեմբերի 9-10-ը «Կոմիտասը և իր ժառանգությունը» գիտաժողովը կշարունակվի արդեն Հալլե-Վիտենբերգի Մարտին Լյութերի համալսարանում:

 Ուշագրավ
Հայաստանում հյուրընկալվելիս, Պենդերեցկին ասել էր, որ հայկական արմատներ ունի
Կինոփառատոնը պետք է կայանար մայիսի 12-23-ը
Թումանյանի ծննդյան օրը՝ փետրվարի 19-ին, Հայաստնում նշվում է գիրք նվիրելու օրը
Կինոշուկան իր մեծությամբ և հնարավորություններով աշխարհում երրորդն է