Զելենսկի. Հրթիռով ինքնաթիռի խոցման վարկածը չի բացառվում, բայց հաստատված էլ չէ

PanARMENIAN.Net - Ուկրաինայի նախագահ Վլադիմիր Զելենսկին հայտարարել է, որ Թեհրանի օդանավակայանի մերձակայքում աղետի ենթարկված ուկրաինական Boeing 737-ի հրթիռակոծման վարկածը հաստատված չէ:

«Մենք մշտական կապի մեջ ենք մեր ներկայացուցիչների հետ: Հրթիռով ինքնաթիռի խոցման վարկածը չի բացառվում, բայց այսօրվա դրությամբ այն հաստատված չէ»,- նշել է Զելենսկին Telegram-ի իր ալիքում:

Նա կոչ է արել ԱՄՆ, Կանադայի և Մեծ Բրիտանիայի կառավարություններին ավիավթարի տարբեր պատճառների ապացույցներ ներկայացնել և փոխանցել դրանք հանձնաժողովին, հայտնում է Gazeta.ru-ն::

Ավելի վաղ Կանադայի վարչապետ Ջասթին Թրյուդոն հայտարարել է, որ կործանված ինքնաթիռը, ըստ կանադական հետախուզության տվյալների, խոցվել է Իրանի կողմից «ցամաք-օդ» դասի հրթիռով: Ըստ նրա՝ հնարավոր է, որ դա միտումնավոր չի արվել:

Զելենսկին նաև հայտնել է, որ հունվարի 10-ին մտադիր է հետաքննության ընթացքի մասին խոսել ԱՄՆ պետքարտուղար Մայք Պոմպեոյի հետ:

Ուկրաինայի ազգային անվտանգության և պաշտպանության խորհուրդն Իրանում ուկրաինական Boeing 737-ի կործանման 3 վարկած ունի. դրանց թվում չէին բացառվել նաև հրթիռային հարվածն ու ահաբեկչությունը:

Հունվարի 8-ին կործանված բոինգում 176 մարդ է եղել, որոնք բոլորը զոհվել են:

Կապակցված նյութ՝ Կանադան և Մեծ Բրիտանիան հայտարարել են՝ Թեհրանում վթարված Boeing 737-ը խոցվել է հրթիռով