Բեյրութի՝ օգոստոսի 4-ի պայթյունից շարքից դուրս եկած նավահանգստի տարածքում կրկին խոշոր հրդեհ է բռնկվել։ Այս մասին պարզ է դառնում օգտատերերի թվիթերյան գրառումներից և հրապարակած տեսանյութերից։
Տեսանյութերում երևում են հրշեջներ, որոնք փորձում են մարել կրակը։ Հրդեհաշիջման աշխատանքներին ներգրավված են նաև բանակի ուղղաթիռներ։
CNBC-ի փոխանցմամբ՝ Լիբանանի զինված ուժերը հայտնել են, որ հրդեհը բռնկվել է պահեստում, որտեղ նավթ և անվադողեր են պահվում։ Հրդեհի պատճառը հայտնի չէ։
Օգոստոսի 4-ի երեկոյան Բեյրութի նավահանգստում ուժգին պայթյուններ են եղել։ Մոտ 200 հոգի մահացել է: Քաղաքում մեծ ավերածություններ կան, վնասվել է նաև հայկական թաղամասը։ Պայթյունի պատճառը նավահանգստի պահեստներում պահվող 2700 տոննա ամոնիումի սելիտրան է եղել։