Կոնգրեսական Քըրքը կասկածում է, որ ԱՄՆ Կոնգրեսը կընդունի Հայոց ցեղասպանության մասին բանաձեւը

PanARMENIAN.Net - Չնայած ԱՄՆ նախագահ Բարաք Օբամայի Օսմանյան կայսրությունում Հայոց ցեղասպանությունը ճանաչելու խոստմանը, Ցեղասպանության մասին բանաձեւը չի ընդունվի ԱՄՆ Կոնգրեսում: Այդ մասին հայտարարել է ԱՄՆ Կոնգրեսում Հայաստանին աջակցության խմբի համանախագահ, հանրապետական Մարկ Քըրքը: «Այս տարի Հայոց ցեղասպանության մասին բանաձեւի ընդունման ակնկալիքները մեծ են, քանի որ Բարաք Օբաման խոստացել է ընդունել Ցեղասպանությունը: Սակայն ինձ թվում է, որ ԱՄՆ ներկայացուցիչների պալատի խոսնակ Նենսի Փելոսին թույլ չի տա օրինագծի ընդունումը», - հայտարարել է Մարկ Քըրքը: Դրա հետ մեկտեղ, կոնգրեսական Քըրքը նշել է, որ եթե ԱՄՆ հայկական համայնքին տրված խոստումը չկատարվի, ապա ժողովրդավարները կարող են պարտություն կրել 2010 թվականին Կոնգրեսի ընտրություններում: Հանրապետական կոնգրեսականն ընդգծել է, որ հավատում է, որ Կոնգրեսը մի օր կընդունի Օսմանյան Թուրքիայում Հայոց ցեղասպանությունը, գրում է թուրքական Hurriyet Daily News թերթը:



Մարտի 17-ին ԱՄՆ Կոնգրեսում ներկայացվել է Հայոց ցեղասպանության ճանաչման մասին բանաձեւը: Բանաձեւը, որի հեղինակներն են Ադամ Շիֆը, Ջորջ Ռադանովիչը, Ֆրենք Փալոունը եւ Մարկ Քըրքը, ԱՄՆ կառավարությանն ու նախագահին կոչ է անում ցեղասպանություն ճանաչել Օսմանյան կայսրությունում հայ ժողովրդի նկատմամբ կիրառված վայրագությունները, որոնք խլել են 1,5 մլն մարդու կյանք: