Սերժ Սարգսյան․ Բանակը մատնել են անտերության

PanARMENIAN.Net - ՀՀ երրորդ նախագահ Սերժ Սարգսյանը, խորին ցավակցություն և վշտակցություն հայտնելով Գեղարքունիքwum տեղակայված՝ ՊՆ N զորամասի ինժեներասակրավորային վաշտի կացարանում հրդեհի հետևանքով զոհված 15 զինծառայողի ընտանիքներին, նշել է, որ խստագույն պատասխանատվության պետք է ենթարկել բոլոր այն պատասխանատուներին, որոնք բանակը մատնել են անտերության։

Սրագսյանը վիրավոր զինծառայողներին մաղթել է շուտափույթ ապաքինում, հայտնում է նախագահի գրասենյակը։

«Նախագահ Սարգսյանը չափազանց կարևորում է ամենասեղմ ժամկետում հայտնաբերելը և խստագույն պատասխանատվության ենթարկելը այդ հանցավոր անտարբերության մեղավորներին և բոլոր այն պատասխանատուներին, որոնք բանակը մատնել են անտերության և տարված են միայն սեփական աթոռը, պետական բարձր պաշտոններն ամեն գնով, այդ թվում՝ հսկայական միջոցներ ծախսելով, պահելու մոլուցքով:

ՀՀ երրորդ նախագահը դեպքն առավել ողբերգական է համարում իշխող վարչակազմի՝ բանակի «աննախադեպ» բարեփոխումների, ծախսերի ավելացման, բանակում պայմանների իբր բարելավման դատարկ ճոռոմաբանությունների համատեքստում»,-ասվում է հաղորդագրության մեջ։

Հունվարի 19-ին՝ ժամը 01:30-ի սահմաններում հրդեհ է բռնկվել Գեղարքունիքի մարզի Ազատ գյուղի տարածքում տեղակայված ՀՀ ՊՆ N զորամասի ինժեներասակրավորային վաշտի կացարանում: Բռնկված հրդեհից 15 ժամկետային զինծառայող է զոհվել, 7 անձ վնասվածքներ է ստացել, որոնցից մեկը սպա է։