Ադրբեջանական մտավորականության ներկայացուցիչները փորձում են շահել հայկական կողմի համակրանքը

PanARMENIAN.Net - «Մեզ հայտնի է դարձել, որ ադրբեջանական մտավորականությունը «կրկին» նախաձեռնություն է հայտնել եւ ցանկանում է հանդիպել հայ մտավորականության հետ քննարկելու համար Լեռնային Ղարաբաղի հարցը»,-հայտարարել է Երեւանում կայացած մամլո ասուլիսում ռազմական հոգեբան Դավիթ Ջամալյանը: Նրա խոսքերով, ադրբեջանական կողմից սա շատ խորամանկ քայլ է, քանի որ նրանք փորձում են շահել հայերի համակրանքը: «Ես գտնում եմ, որ այս հանդիպումը վտանգավոր է հայկական կողմի համար: Ի տարբերություն հայերի, ադրբեջանցիները լավ են նախապատրաստվում նման հանդիպումների»,-ասել է Ջամալյանը:



Ըստ Ջամալյանի, քանի դեռ հայկական մտավորականությունը պատրաստվում է հերթական «ելքին դեպի աշխարհ», ադրբեջանական կողմը մշակում է «հոգեբանական ճնշման» որոշակի ռազմավարություն, ինչից կարելի է խուսափել, եթե հայերը հոգեբանորեն նախապատրաստվեն նման հանդիպումների, ինչն այս պահի դրությամբ, ցավոք, չկա:



Իր հերթին «Armenianhouse.org» էլեկտրոնային գրադարանի տնօրեն Կարեն Վրթանեսյանը կոչ է արել չմոռանալ, որ «մտավորականները սովորական մարդիկ են, եւ նրանցից յուրաքանչյուրը կգործի, ելնելով իր շահից»: Վրթանեսյանը նշել է, որ այսօրվա դրությամբ հայերի համար ոչ մի շահավետ բան չի տեսնում:



Հստակ ժամանակն ու հանդիպման վայրը դեռեւս որոշված չէ, հայտնի է միայն, որ երկու երկրների մտավորականների հանդիպումը տեղի կունենա հուլիսին, դեռեւս հայտնի չէ, թե հայկական կողմից ով է հանդես գալու: