Թուրքիայի հետ սահմանի բացման դեպքում Հայաստանը կարող է տարածաշրջանում էներգետիկ հանգույցներից մեկը դառնալ

PanARMENIAN.Net -
Թուրքիայի քաղաքացիական հասարակությունը միակ հիմնական ուժն է, որն օժանդակում է հայ-թուրքական հարաբերությունների կարգավորման մասին Արձանագրությունների վավերացումը: Այդ մասին PanARMENIAN.Net ի թղթակցի հետ զրույցում հայտնեց «Հայաստանի եվրոպական բարեկամներ» (EuFoA) կազմակերպության փորձագետ Սարգիս Գազարյանը:



Գնահատելով հայ-թուրքական սահմանի բացման աշխարհաքաղաքական նշանակությունը` փորձագետն ընդգծեց, որ Հայաստանը պետք է օգտագործի այդ հնարավորությունը անդրտարածաշրջանային էներգետիկ նախագծերի մեջ ինտեգրվելու համար: «Հայաստանը կարող է տարածաշրջանում էներգետիկ հանգույցներից մեկը դառնալ` հաշվի առնելով Իրանին Nabucco նախագծի մեջ ներգրավելու ԵՄ պատրաստակամությունը»,- ընդգծեց Սարգիս Գազարյանը: Նրա խոսքով, ԵՄ-ն պետք է ուժեղացնի իր մասնակցությունը հայ-թուրքական գործընթացի այս որոշիչ փուլում եւ նպաստի Եվրոպայի «ամենահսկա պատի» փլուզմանը: «Թուրքիան կարող է այս տարի բացել սահմանը, եւ դա բխում է հենց Անկարայի շահերից»,- ընդգծեց Գազարյանը:



«Հայաստանի Հանրապետությունն ու Թուրքիայի Հանրապետությունը, առաջնորդվելով դիվանագիտական հարաբերությունների հաստատման մասին օգոստոսի 31-ին ստորագրված Արձանագրությամբ, համաձայն են բացել ընդհանուր սահմանը երկու ամիս անց այն բանից հետո, երբ Արձանագրություններն ուժի մեջ մտնեն»,- ասվում է հայ-թուրքական հարաբերությունների կարգավորման մասին Արձանագրություններում: