Հայոց ցեղասպանության 95-ամյա տարելիցի կապակցությամբ Կիեւում կբացվի հայկական պուրակ

22 մարտի 2010 - 11:22 AMT

PanARMENIAN.Net - Ուկրաինայի Հայերի ազգային կոնգրեսն (ՈՒՀԱԿ) անցկացրել է երկրորդ նիստը` նվիրված Հայոց ցեղասպանության 95-ամյա տարելիցի միջոցառումներին:

Նիստին մասնակցում էին մշակույթի, բիզնեսի եւ այլ ոլորտների անվանի գործիչներ: Քննարկվել են կազմակերպչական հարցեր` նվիրված Կիեւում հայկական պուրակ ստեղծելուն, Հայոց ցեղասպանության զոհերի 95-ամյա տարելիցի հուշարձան կանգնեցնելուն: Որոշվել է նաեւ անցկացնել Ցեղասպանության մասին ֆիլմի ցուցադրում եւ ուկրաինացի հայտնի կատարողների մասնակցությամբ համերգ-ռեքվիեմ:

Նիստի ընթացքում ներկայացվել է ՈՒՀԱԿ նոր փոխնախագահը` Նորայր Դավիդյանը: Կոնգրեսում ստեղծվել է նաեւ հոգաբարձուների խորհուրդ եւ ճարտարապետական հանձնաժողով, ինչպես նաեւ նշանակվել են Խմելնիցկի, Կիրովագրադի, Զապորոժյեի եւ Պոլտավայի մարզերի տարածաշրջանային բաժանմունքների ղեկավարներ:

Ավելի վաղ ՈՒՀԱԿ ներկայացուցիչներ են նշանակվել Լուգանսկի, Դոնեցկի, Դնեպրոպետրոկսվի, Չերնիգովի, Խարկովի, Սումսկի, Լվովի, Կիեւի, Ղրիմի,եւ այլ մարզերում, ինչպես նաեւ Կիեւ եւ Սեւաստոպոլ քաղաքներում, հաղորդում է Analitika.at.ru-ն:

Հայոց ցեղասպանություն

Հայոց ցեղասպանությունը, որն իրագործվել է Օսմանյան կայսրությունում 1915-1923թթ., XX դարի առաջին ցեղասպանությունն էր, որի նախաձեռնողները երիտթուրքերն էին: Ցեղասպանության ժամանակ ոչնչացվեց վեց հայկական վիլայեթների բնակչությունը` մոտ 1,5 մլն հայ: Եվս կես միլիոնը սփռվեց աշխարհով մեկ` սկիզբ դնելով հայկական Սփյուռքին:

Դեռևս Ցեղասպանության իրագործման տարիներին` 1915-23թթ. տերությունները ընդունեցին հայերի կոտորածը դատապարտող բանաձևեր: ԱՄՆ-ն երեք անգամ (1916, 1919, 1920) նմանատիպ բանաձևեր է ընդունել, սակայն դա չկասեցրեց Օսմանյան կայսրության գործողությունները: 1915թ. Ֆրանսիան, Մեծ Բրիտանիան և Ռուսաստանը հանդես եկան համատեղ հռչակագրով` դատապարտելով հայերի բնաջնջումը:

Աշխարհի շատ երկրներ և ազդեցիկ միջազգային կազմակերպություններ ճանաչել և դատապարտել են Հայոց ցեղասպանությունը: Պաշտոնապես առաջինը Հայոց ցեղասպանությունն ընդունել և դատապարտել է Ուրուգվայը 1965թ-ին: Հայոց ցեղասպանությունը ճանաչել են նաև Եվրոպայի Խորհուրդը, Եվրախորհրդարանը, ՄԱԿ-ի խտրականության կասեցման և փոքրամասնությունների պաշտպանության կանխարգելման ենթահանձնաժողովը, ՄԱԿ-ի ռազմական հանցագործությունների գծով հանձնաժողովը, Եկեղեցիների համաշխարհային խորհուրդը: Հայերի ոչնչացումը պաշտոնապես ցեղասպանություն են ճանաչել Ֆրանսիան, Ավստրիան, Իտալիան, Գերմանիան, Բելգիան, Լյուքսեմբուրգը, Շվեդիան, Նիդերլանդները, Շվեյցարիան, Ռուսաստանը, Լեհաստանը, Լիտվան, Հունաստանը, Սլովակիան, Կիպրոսի Հանրապետությունը, Լիբանանը, Ուրուգվայը, Արգենտինան, Վենեսուելան, Չիլին, Բոլիվիան, Կանադան, Վատիկանը, Բրազիլիան, Լյուքսեմբուրգը, Գերմանիան, Պարագվայը, Սիրիան և ԱՄՆ-ի 45 նահանգ:

Բելգիայում և Շվեդիայում Հայոց ցեղասպանության ժխտման համար քրեական պատասխանատվություն է սահմանված (45 հազար եվրո տուգանքից մինչև 1 տարվա ազատազրկում): 2006թ. հոկտեմբերի 12-ին Ֆրանսիայի խորհրդարանն օրինագիծ ընդունեց, որի համաձայն Հայոց ցեղասպանության ժխտումը կքրեականացվի, ինչպես Հոլոքոսթը:

Ժամանակակից Թուրքիան ժխտում է Հայոց ցեղասպանության պատմական փաստը և վարում է այդ փաստի ժխտման ներքին և արտաքին քաղաքականություն: Թուրքական պետության գործողությունները ներկայացվում են որպես «բռնագաղթ»` հայերի անվտանգությունն ապահովելու նպատակով: Հայոց ցեղասպանության ճանաչման անհրաժեշտության մասին խոսում են միայն առանձին թուրք մտավորականներ, որոնց թվում են պատմաբան Թաներ Աքչամն ու Նոբելյան մրցանակի դափնեկիր Օրհան Փամուկը: