Կուբանի հայերը Կրասնոդարի շրջանի Օրենսդրական ժողովին կոչ են անում ճանաչել Հայոց ցեղասպանությունը

18 ապրիլի 2010 - 16:24 AMT

PanARMENIAN.Net - Ապրիի 17-ին Կուբանի Սլավյանսկ քաղաքում (Կրասնոդարի շրջան) կայացավ "Հայոց ցեղասպանությունն ու Արևմտյան Հայաստանը" խորհրդաժողովը: Ինչպես հաղորդում է Ռուսաստանի հայերի "Երկրամաս" թերթի Տեղեկատվական կենտրոնը, խորհրդաժողովին մասնակցում էին շրջանում գործող հայկական հասարակական կազմակերպությունների ներկայացուցիչները:

Խորհրդաժողովի շրջանակներում կայացավ "Երկրամաս" թերթի կողմից պատրաստված Հայոց ցեղասպանության մասին փաստագրական ֆիլմի շնորհանդեսը:

Զեկույցներով հանդես եկան Կուբանի Սլավյանսկի Միջազգային բարեկամության Ակումբի նախագահ Անաիդա Մելտոնյանը ("Հայոց ցեղասպանությունը` պատմությունը և մեր օրերը"), "Համշեն" Կենտրոնի նախագահ, Ապշերոնսկ քաղաքի պատգամավորների քաղաքային խորհրդի պատգամավոր Արտավազդ Թուլումջյանը ("Հայերը Թուրքիայում և Արևմտյան Հայաստանում այսօր") և Ռուսաստանի հայերի "Երկրամաս" թերթի գլխավոր խմբագիր, Արևմտյան Հայաստանի Հայկական Ազգային Խորհրդի ներկայացուցիչ Տիգրան Թավադյանը ("Հայ ժողովրդի տարածքային իրավունքների վերականգնման մասին"):

Խորհրդաժողովի արդյունքներով Կրասնոդարի շրջանի Օրենսդրական ժողովի պատգամավորներին ուղղված դիմում ընդունվեց` Թուրքիայի Հայոց ցեղասպանության ճանաչման և դատապարտման մասին համապատասխան հայտարարություն ընդունելու ճանապարհով XX դարասկզբին հայ ժողովրդի դեմ իրագործված հանցագործության փաստի առնչությամբ իրենց վերաբերմունքը արտահայտելու կոչով:

Կուբանի Սլավյանսկի հայ համայնքի և Ռուսաստանի հայերի "Երկրամաս" թերթի կողմից կազմակերպված խորհրդաժողովը տեղի ունեցավ Սլավոնական Պետական Մանկավարժական Ինստիտուտի նիստերի դահլիճում:

Հղումներ թեմայով.

http://www.yerkramas.org/2010/04/18/na-kubani-proshla-obshhestvennaya-konferenciya-genocid-armyan-i-zapadnaya-armeniya/

Հայոց ցեղասպանություն

Հայոց ցեղասպանությունը, որն իրագործվել է Օսմանյան կայսրությունում 1915-1923թթ., XX դարի առաջին ցեղասպանությունն էր, որի նախաձեռնողները երիտթուրքերն էին: Ցեղասպանության ժամանակ ոչնչացվեց վեց հայկական վիլայեթների բնակչությունը` մոտ 1,5 մլն հայ: Եվս կես միլիոնը սփռվեց աշխարհով մեկ` սկիզբ դնելով հայկական Սփյուռքին:

Դեռևս Ցեղասպանության իրագործման տարիներին` 1915-23թթ. տերությունները ընդունեցին հայերի կոտորածը դատապարտող բանաձևեր: ԱՄՆ-ն երեք անգամ (1916, 1919, 1920) նմանատիպ բանաձևեր է ընդունել, սակայն դա չկասեցրեց Օսմանյան կայսրության գործողությունները: 1915թ. Ֆրանսիան, Մեծ Բրիտանիան և Ռուսաստանը հանդես եկան համատեղ հռչակագրով` դատապարտելով հայերի բնաջնջումը:

Աշխարհի շատ երկրներ և ազդեցիկ միջազգային կազմակերպություններ ճանաչել և դատապարտել են Հայոց ցեղասպանությունը: Պաշտոնապես առաջինը Հայոց ցեղասպանությունն ընդունել և դատապարտել է Ուրուգվայը 1965թ-ին: Հայոց ցեղասպանությունը ճանաչել են նաև Եվրոպայի Խորհուրդը, Եվրախորհրդարանը, ՄԱԿ-ի խտրականության կասեցման և փոքրամասնությունների պաշտպանության կանխարգելման ենթահանձնաժողովը, ՄԱԿ-ի ռազմական հանցագործությունների գծով հանձնաժողովը, Եկեղեցիների համաշխարհային խորհուրդը: Հայերի ոչնչացումը պաշտոնապես ցեղասպանություն են ճանաչել Ֆրանսիան, Ավստրիան, Իտալիան, Գերմանիան, Բելգիան, Լյուքսեմբուրգը, Շվեդիան, Նիդերլանդները, Շվեյցարիան, Ռուսաստանը, Լեհաստանը, Լիտվան, Հունաստանը, Սլովակիան, Կիպրոսի Հանրապետությունը, Լիբանանը, Ուրուգվայը, Արգենտինան, Վենեսուելան, Չիլին, Բոլիվիան, Կանադան, Վատիկանը, Բրազիլիան, Լյուքսեմբուրգը, Գերմանիան, Պարագվայը, Սիրիան և ԱՄՆ-ի 45 նահանգ:

Բելգիայում և Շվեդիայում Հայոց ցեղասպանության ժխտման համար քրեական պատասխանատվություն է սահմանված (45 հազար եվրո տուգանքից մինչև 1 տարվա ազատազրկում): 2006թ. հոկտեմբերի 12-ին Ֆրանսիայի խորհրդարանն օրինագիծ ընդունեց, որի համաձայն Հայոց ցեղասպանության ժխտումը կքրեականացվի, ինչպես Հոլոքոսթը:

Ժամանակակից Թուրքիան ժխտում է Հայոց ցեղասպանության պատմական փաստը և վարում է այդ փաստի ժխտման ներքին և արտաքին քաղաքականություն: Թուրքական պետության գործողությունները ներկայացվում են որպես «բռնագաղթ»` հայերի անվտանգությունն ապահովելու նպատակով: Հայոց ցեղասպանության ճանաչման անհրաժեշտության մասին խոսում են միայն առանձին թուրք մտավորականներ, որոնց թվում են պատմաբան Թաներ Աքչամն ու Նոբելյան մրցանակի դափնեկիր Օրհան Փամուկը: