Մոսկվայում Ադրբեջանը գնում է մարգինալների և ստեղծում նրանցից կազմված գիտական կենտրոններ

PanARMENIAN.Net - «Չնայած նրան, որ պատմաբանները ողջ Մոսկվայում փնտրել են Մեհմեդ Պերինչեկի «Հայկական հարցը» գիրքը, այնպես էլ չեն կարողացել այն գտնել: Դա շատ տարօրինակ է, քանի որ նման գրքերի հրատարակության ժամանակ անցկացվում է PR ակցիա: Բայց, տվյալ դեպքում, այդ գրքի մասին գրել են միայն ադրբեջանական ԶԼՄ-ները»,- PanARMENIAN.Net ի թղթակցի հետ զրույցում հայտարարել է Սևծովյան և Կասպիական տարածաշրջանի քաղաքական և սոցիալական հետազոտությունների ինստիտուտի տնօրեն Վլադիմիր Զախարովը: Նա հիշեցրել է, որ գրքի մեջ մտնում են «120 իրական և եզակի փաստաթղթեր Ռուսաստանի պետական արխիվներից»: «Ինչ էլ որ այդ, այսպես կոչված, պատմաբաններն առաջարկել են ադրբեջանցի ընթերցողին, անհնար է ստուգել: Ռուսական արխիվներում պահպանվում են հազարավոր փաստաթղթեր, որոնք հաստատում են Հայոց ցեղասպանությունը և 120-ը կամ 200-ը ոչինչ չեն կարող անել»,- ասել է Զախարովը և հավելել, որ կան 1915-ի դեպքերի հազարավոր ականատեսներ: «Ես չեմ խոսում ռուսական մամուլի և աղբյուրների մասին, այդ մասին գրել են արևմտյան երկրների դիվանագետները և լրագրողները: Մոսկվայում Ադրբեջանը գնում է մարգինալների և ստեղծում գիտական կենտրոններ, որոնք կազված են նրանցից: Ես անձամբ գիտեմ նման «գիտնականների, որոնք ամիս մեկ անգամ Մոսկվայում Ադրբեջանի դեսպանատնից ստանում են փողերով ծրարներ: Բայց լուրջ հետազոտողներից ոչ ոք նրանց վրա ուշադրություն չի դարձնում»,- ասել է Զախարովը:

ԱզերԹաժը նախօրեին հայտնել է, որ Մոսկվայում լույս է տեսել «Հայկական հարցը» գիրքը, որի մեջ մտել են ռուսական պետական արխիվների 120 փաստաթղթեր, որոնք հերքում են «Հայոց ցեղասպանության մասին պնդումները»: Գրքի հեղինակը թուրք պատմաբան Մեհմեդ Պերինչեկն է: