Ռ.Քոչարյան. Ես կհարգեմ ժողովրդի ցանկացած ընտրությունը

PanARMENIAN.Net - «Այսօր Հայաստանի ժողովուրդը կանգնած է ընտրության առջեւ. ունենալ իշխանության թեւերի միջեւ հավասարակշռված պետական կառավարման համակարգ, թե պահպանել ուժեղ նախագահական իշխանություն, որը նախատեսված է գործող Սահմանադրությամբ: Անկասկած, ես կհարգեմ ժողովրդի ցանկացած որոշում»,-հայտարարել է Հայաստանի նախագահ Ռոբերտ Քոչարյանը քվեարկությանը մասնակցելուց հետո լրագրողների հետ զրույցում: Նրա խոսքերով, եթե ընտրությունը կատարվի առավել հավասարակշռված համակարգի օգտին, որի կողմնակիցն եմ նաեւ ես, ապա «մենք կաշխատենք օրենսդրությունը ընդունված փոփոխություններին համապատասխանեցնելու ուղղությամբ, իսկ «ոչը» կնշանակի, որ պահպանվում է ուժեղ նախագահական իշխանությունը»: Ռ.Քոչարյանը նշել է, որ ակնկալում է լեգիտիմ եւ հստակ կազմակերպված գործընթաց: «Չեմ ցանկանում կանխատեսել, թե ինչպիսին կլինի արդյունքը, եւ դեռեւս չեմ հետաքրքրվել, թե ինչպես է ընթանում քվեարկությունը»,-հայտարարել է Հայաստանի նախագահը: Նշենք, որ Ռոբերտ Քոչարյանը իր քվեաթերթիկը լրացրել է այնպես, որ մյուս ընտրողները տեսնեն, թե ինչպես է նա «կողմ» քվեարկել սահմանադրական փոփոխություններին: