Արման Մելիքյան. Հայ-թուրքական հարաբերությունների կարգավորման գործընթացը սխալ ընթացք է ստացել

9 փետրվարի 2010 - 13:52 AMT

PanARMENIAN.Net -
Հայ-թուրքական արձանագրությունների ձախողման դեպքում, Հայաստանը տարածաշրջանում նոր ակտիվ հակառակորդ կստանա` Թուրքիային: Այդ մասին Երեւանում կայացած մամլո ասուլիսում հայտարարել է Արցախի Հանրապետության ԱԳ նախկին նախարար Արման Մելիքյանը: Ըստ նրա, ձախողման դեպքում Թուրքիան կակտիվացնի հակահայկական գործողությունները տարածաշրջանում: Ընդ որում նա նշել է, որ ՀՀ ղեկավարությունը պատկերացում անգամ չուներ հետեւանքների մասին, երբ նախաձեռնում էր այս գործընթացը: «Իրականում Հայաստանի իշխանությունները պատրաստ չէին նման պատասխանատվություն ստանձնել, թեեւ հայտարարում էին հակառակը»,-ասել է Մելիքյանը` հավելելով, որ ՀՀ ղեկավարությունը պետք է ամեն ինչ ծանր ու թեթեւ անի ու գնահատի ստեղծված իրավիճակը: Ըստ Մելիքյանի, Հայաստանի իշխանությունները պատրաստ չէին այս գործընթացին, ուստի հայ-թուրքական հարաբերությունների կարգավորման գործընթացը սխալ ընթացք ստացավ:

«Ի սկզբանե Հայ-թուրքական արձանագրությունները շահավետ չէին Հայաստանի համար»,-ասել է Մելիքյանը` նշելով, որ Արձանագրությունների հայտնվերը Հայաստանի կողմից քաղաքականության բացակայության նշան էր: Ըստ նրա, երկիրն այլեւս չի կարողանա վերադառնալ նախկին դիրքերին այս հարցում եւ ստիպված է լինելու գործել նոր հանգամանքներում:

«Դեռ ամեն ինչ կորած չէ, ուղղակի բացթողումները շատ են, որոնք հարկավոր է շտկել»,-ասել է Արման Մելիքյանը` հավելելով, որ Հայաստանը պետք է արժանապատվորեն դուրս գա այս գործընթացից, չվնասելով իր ազգային շահերին:

Մեկնաբանելով ԱՄՆ Ներկայացուցիչների պալատի արտաքին հարաբերությունների կոմիտեի որոշումը` Հայոց ցեղասպանության մասին թիվ 252 բանաձեւը քվեարկության դնելու վերաբերյալ` Մելիքյանն ասել է, որ, չի կարծում, թե ԱՄՆ Կոնգրեսը ինչ-որ գործուն քայլեր կձեռնարկի մինչ ՌԴ նախագահի այցը Թուրքիա, որը տեղի կունենա մայիսին:

Հայոց ցեղասպանության մասին բանաձև

252 բանաձևը Ներկայացուցիչների պալատին են ներկայացրել Ադամ Շիֆն ու Ջորջ Ռադանովիչը: Ներկայումս բանաձևին սատարում են շուրջ 140 կոնգրեսականներ: 2010 թվականի մարտի 4-ին Ներկայացուցիչների պալատի արտաքին հարաբերությունների կոմիտեն հավանություն տվեց բանաձևին՝ 22 «կողմ» և 21 «դեմ» ձայների հարաբերակցությամբ: Նմանատիպ բանաձև է ներկայացված նաև ԱՄՆ Սենատում:

Հայ-թուրքական հարաբերությունների կարգավորման մասին Արձանագրություններ

Հայ-թուրքական հարաբերությունների կարգավորման մասին Արձանագրությունները ստորագրվել են 2009թ. հոկտեմբերի 10-ին Ցյուրիխում: Արձանագրությունները ստորագրել են Հայաստանի եւ Թուրքիայի ԱԳ նախարարներ Էդվարդ Նալբանդյանը եւ Ահմեդ Դավութօղլուն` Ֆրանսիայի, ԱՄՆ-ի, ՌԴ-ի եւ Շվեյցարիայի ԱԳՆ ղեկավարների ներկայությամբ: Շվեյցարիան որպես միջնորդ է հանդես գալիս հայ-թուրքական բանակցություններում 2007թ. ի վեր: Ըստ փաստաթղթերի, երկրների միջեւ պետք է հաստատվեն դիվանագիտական հարաբերություններ եւ պետք է բացվի 1993թ. ի վեր փակ հայ-թուրքական սահմանը: Հունվարի 12-ին Հայաստանի Սահմանադրական դատարանն Արձանագրությունները Հայաստանի Սահմանադրությանը համապատասխան ճանաչեց: ՍԴ որոշման մեջ Արձանագրությունների վերաբերյալ ոչ մի նախապայմաններ չկան, քանի որ դա հակասում է վճռի կայացման սահմանված կանոնին: ՍԴ որոշման համաձայն Հայ-թուրքական արձանագրությունները համապատասխանում են ՀՀ Սահմանադրությանն ու Հայաստանի Անկախության մասին հռչակագրին: