Երեւանում ՍՏՀԿ երկրների պատմական հուշարձանների պահպանման թեմայի շուրջ կլոր սեղան տեղի կունենա

PanARMENIAN.Net - Մարտի 4-ից Սեւծովյան տնտեսական համագործակցության կազմակերպությունում (ՍՏՀԿ) ՀՀ նախագահության շրջանակներում Երեւանում տեղի կունենան մի շարք մշակութային միջոցառումներ: ՀՀ մշակույթի նախարարությունը կազմակերպում է մշակութային համալիր ծրագիր` մասնակցությամբ կազմակերպության անդամ պետությունների. Բուլղարիա, Թուրքիա, Հայաստան, Հունաստան, Ռումինիա, Ռուսաստան, Սերբիա եւ Վրաստան:



Ծրագրի շրջանակներում նախատեսվում են. կլոր սեղանի անցկացում` «Համագործակցությունը Սեւծովյան տարածաշրջանի պատմամշակութային հուշարձանների պահպանության եւ վերականգնման ոլորտում»: Կլոր սեղանի քննարկումները կմեկնարկեն մարտի 4-ին, ժամը 10-ին` «Անի-Պլազա» հյուրանոցի «Դվին դահլիճում»: Մարտի 4-11-ը Հայաստանի պատկերասարհում տեղի կունենա «Սեւծովյան երկրների մշակութային խճանկար» խորագրով Սեւծովյան տարածաշրջանի երկրների ցուցահանդեսը, որի բացումը կկայանա մարտի 4-ին, ժ. 16:00-ին: Նույն ժամանակաընթացքում` Հայաստանի ազգային պատկերասրահի ֆիլմերի ցուցադրության դահլիճում` ժամը 17-18-ը տեղի կունենա Ֆիլմերի ցուցադրություն` «Սեւծովյան տարածաշրջանի պատմամշակութային հուշարձանների պահպանություն եւ վերականգնում» թեմայով:



Մարտի 5-ին, ժ. 15-ին Գեղագիտության ազգային կենտրոնում կբացվի «Սեւ ծովին` ար-ոտ երկինք» խորագրով Սեւծովյան տարածաշրջանի երկրների մանկական ցուցահանդեսը, որը կտեւի մինչեւ մարտի 10-ը: