Ֆրանսիացի գրող Ժիլբեր Սինուեյի «Երևան» գիրքը թարգմանվել է բուլղարերեն

Ֆրանսիացի գրող Ժիլբեր Սինուեյի «Երևան» գիրքը թարգմանվել է բուլղարերեն

PanARMENIAN.Net - Հունիսի 11-ին Պլովդիվի «Տրակարտ» մշակութային համալիրի ցուցասրահում կայացել է վերջերս Սոֆիայում «ՎԱԿՈՆ» հրատարակչության կողմից տպագրված ֆրանսիացի գրող Ժիլբեր Սինուեյի «Երևան» գրքի բուլղարերեն թարգմանության շնորհանդեսը:

Գիրքը փաստավավերագրական վեպ է, որում հեղինակն ականատեսների և պատմական փաստերի ներկայացմամբ անդրադարձել է 1915-22թթ. Օսմանյան կայսրության կողմից հայերի նկատմամբ իրականացված ոճրագործություններին և ցեղասպանության խնդրին:

Գրքում օգտագործված փաստերը, հերոսները, հիշատակված անձինք նույնպես իրական են, քանի որ դրանք վերցված են նշյալ ժամանակահատվածը բնութագրող արժեքավոր փաստաթղթերից:

Շնորհանդեսին ներկա Բուլղարիայում Հայաստանի դեսպան Սերգեյ Մանասարյանը, ողջունելով նախաձեռնողներին և շնորհակալություն հայտնելով գրքի թարգմանիչ-խմբագիր Զլատկո Ստայկովին, ևս կարևորեց այն հանգամանքը, որ վեպը բոլորի կողմից գնահատվում է ոչ միայն որպես գեղարվեստական ստեղծագործություն, այլև` փաստավավերագրական մի փոքրիկ արխիվ, որի շնորհիվ ընթերցողին հնարավորությունն է տրվում օբյեկտիվ գնահատել տվյալ ժամանակահատվածում տեղի ունեցած իրադարձությունները, մասնավորապես` հայերի նկատմամբ թուրքերի գործած բարբարոսություններն ու վայրագությունները:

Հայոց ցեղասպանություն

Հայոց ցեղասպանությունը, որն իրագործվել է Օսմանյան կայսրությունում 1915-1923թթ., XX դարի առաջին ցեղասպանությունն էր, որի նախաձեռնողները երիտթուրքերն էին: Ցեղասպանության ժամանակ ոչնչացվեց վեց հայկական վիլայեթների բնակչությունը` մոտ 1,5 մլն հայ: Եվս կես միլիոնը սփռվեց աշխարհով մեկ` սկիզբ դնելով հայկական Սփյուռքին:

Դեռևս Ցեղասպանության իրագործման տարիներին` 1915-23թթ. տերությունները ընդունեցին հայերի կոտորածը դատապարտող բանաձևեր: ԱՄՆ-ն երեք անգամ (1916, 1919, 1920) նմանատիպ բանաձևեր է ընդունել, սակայն դա չկասեցրեց Օսմանյան կայսրության գործողությունները: 1915թ. Ֆրանսիան, Մեծ Բրիտանիան և Ռուսաստանը հանդես եկան համատեղ հռչակագրով` դատապարտելով հայերի բնաջնջումը:

Աշխարհի շատ երկրներ և ազդեցիկ միջազգային կազմակերպություններ ճանաչել և դատապարտել են Հայոց ցեղասպանությունը: Պաշտոնապես առաջինը Հայոց ցեղասպանությունն ընդունել և դատապարտել է Ուրուգվայը 1965թ-ին: Հայոց ցեղասպանությունը ճանաչել են նաև Եվրոպայի Խորհուրդը, Եվրախորհրդարանը, ՄԱԿ-ի խտրականության կասեցման և փոքրամասնությունների պաշտպանության կանխարգելման ենթահանձնաժողովը, ՄԱԿ-ի ռազմական հանցագործությունների գծով հանձնաժողովը, Եկեղեցիների համաշխարհային խորհուրդը: Հայերի ոչնչացումը պաշտոնապես ցեղասպանություն են ճանաչել Ֆրանսիան, Ավստրիան, Իտալիան, Գերմանիան, Բելգիան, Լյուքսեմբուրգը, Շվեդիան, Նիդերլանդները, Շվեյցարիան, Ռուսաստանը, Լեհաստանը, Լիտվան, Հունաստանը, Սլովակիան, Կիպրոսի Հանրապետությունը, Լիբանանը, Ուրուգվայը, Արգենտինան, Վենեսուելան, Չիլին, Բոլիվիան, Կանադան, Վատիկանը, Բրազիլիան, Լյուքսեմբուրգը, Գերմանիան, Պարագվայը, Սիրիան և ԱՄՆ-ի 45 նահանգ:

Բելգիայում և Շվեդիայում Հայոց ցեղասպանության ժխտման համար քրեական պատասխանատվություն է սահմանված (45 հազար եվրո տուգանքից մինչև 1 տարվա ազատազրկում): 2006թ. հոկտեմբերի 12-ին Ֆրանսիայի խորհրդարանն օրինագիծ ընդունեց, որի համաձայն Հայոց ցեղասպանության ժխտումը կքրեականացվի, ինչպես Հոլոքոսթը:

Ժամանակակից Թուրքիան ժխտում է Հայոց ցեղասպանության պատմական փաստը և վարում է այդ փաստի ժխտման ներքին և արտաքին քաղաքականություն: Թուրքական պետության գործողությունները ներկայացվում են որպես «բռնագաղթ»` հայերի անվտանգությունն ապահովելու նպատակով: Հայոց ցեղասպանության ճանաչման անհրաժեշտության մասին խոսում են միայն առանձին թուրք մտավորականներ, որոնց թվում են պատմաբան Թաներ Աքչամն ու Նոբելյան մրցանակի դափնեկիր Օրհան Փամուկը:

 Ուշագրավ
Տիգրան Ավինյանն ու Գրեգորի Դուսեն այցելել են պատմական թաղամաս
Snap-ը պլատինե երգի կարգավիճակ է ստացել նաև մի քանի այլ երկրներում
Հայկական դուդուկի երաժշտությունը ՅՈՒՆԵՍԿՕ-ի ցանկում է ընդգրկվել դեռևս 2008 թ․
Ցուցադրությունը կազմակերպվում է այս երեք ֆիլմերի Պոմպիդու կենտրոնին հանձնման արարողության առիթով
---